KUCHING: Chara inklusiviti ti dikemeran Perintah Sarawak meruan ngenegap pemanah kaul enggau pengelantang pengidup rayat pupu bansa di nengeri tu.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, chara nya deka ngemuntangka agi pengawa meri bantu enggau pemeri ari perintah ngagai genap iku rayat.
"Sebedau tu kitai meri pemeri tu maya Hari Raya Aidilfitri tang ba taun kitai meri maya Taun Baru China enggau Hari Gawai.
"Tu siti chara inklusiviti kitai alai perintah ngerami tiga hari besai tu lebih agi ungkup raban ke gawa maya nya," pia ku iya.
Iya bejaku munyi nya maya Pengerami Ngelai Nyua Pemeri Hari Gawai ba Dewan Kunsil Nengeri (DUN) Sarawak ditu, Hari Empat.
Iya mega madah, pemeri nya ukai semina dikena masa pengawa raban terabai menua aja tang bela ngerichah agi pemanah kaul enggau pengelantang pengidup rayat Sarawak.
Iya bela ngena awak nya beterima kasih ngagai Opis Raban Indu enggau Ruang Bilik Sarawak ti ransing nyendiaka pemeri nya ungkup raban gawa maya Gawai Dayak tu ila.
Bela datai maya nya Sapit Premier Sarawak Datuk Amar Awang Tengah Ali Hasan, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri Sarawak, bala Kaban Kunsil Nengeri sereta bala Tuai Opis Perintah. -EDISI UKAS
