KUCHING: Perintah Sarawak mandangka pengeransing masa raban media nengah pengawa meri insentif khas sepenyampau RM317,800 ngagai enam gerempung media berejista di nengeri tu.
Enam gerempung tu iya nya Commonwealth Journalists Association Sarawak Branch nerima RM15,400, Journalists Association of Kuching (RM175,000), Pertubuhan Wartawan Bebas Kuching (RM16,100), Sibu Journalists Association (RM28,000), The Institute of Rejang Journalists Sarawak (RM39,200) enggau Northern Sarawak Journalists Association (RM44,100).
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, bantu khas nya kebendar iya nadai ba langgur keterubah perintah tauka dipejurai ba bajet sebedau tu.
Ku iya, insentif khas nya dipadahka Premier Sarawak empu maya nyimpul Aum Ketiga bagi Penggal Keempat Kunsil Nengeri (DUN) Sarawak Ke-19.
Iya madah, pemutus nya digaga dikena masa raban media baik nya media prebet tauka media nengeri ke udah bebendar ngenataika penerang perintah ngagai rayat.
"Enti bulih, bulih. Tang enti enda pan enda ngawa laban tu ukai ba langgur keterubah perintah.
"Tang kitai ngasaika raban media baik nya media prebet tauka media nengeri bela bejalaika tanggungpengawa besai ngenataika penerang ngagai rayat," pia ku iya.
Iya bejaku munyi nya ba aum media Pengawa Ngelai Nyua Pemeri Insentif Khas ngagai Gerempung Media Sarawak ba Kunsil Nengeri (DUN) Sarawak, Hari Empat.
Insentif nya mandangka basa ari Premier Sarawak ngagai pengeransing raban media ke nyadi bakih strategik perintah ngenataika berita enggau penerang ngagai rayat mayuh.
Semua raban media ke nerima pemeri nya bisi 454 iku ari enam gerempung media berejista di Sarawak.-EDISI UKAS
