Empat RUU Deka Dipejurai Ba Aum DUN Sarawak Kena 11-20 Mei Tu
KUCHING: Bisi empat Rang Undang- Undang (RUU) deka dipejurai ba Aum Ketiga Penggal Kelima Kunsil Nengeri (DUN) Sarawak Ke-19 ti deka diatur belabuh ari 11 nyentuk 20 Mei 2026 di Kompleks DUN Sarawak.
Speaker DUN Sarawak Tan Sri Datuk Amar Mohamad Asfia Awang Nassar madah, pengawa bejuraika RUU Perintah ari Menteri beempu tanggungpengawa deka dipejalai kena 12 Mei 2026 enggau 14 Mei 2026.
“Empat RUU ti deka dipejurai iya nya RUU Belanja Tambah (2025) 2026, RUU Belanja Tambah (2026) 2026, RUU Kaunsil Padi enggau Berau Sarawak 2026 sereta RUU Kaunsil Pemansang Ekonomi Sarawak (Ubah) 2026,” ku iya.
Iya nibar jaku nya ba aum pemberita pengudah Aum Supreme Kaunsil serimbai Aum DUN Sarawak ti betuai ke Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Indu Opis Parti Pesaka Bumiputera Bersatu (PBB), kena Hari Enam.
Iya madah, RUU Perbekalan Tambahan (2025) 2026 enggau RUU Perbekalan Tambahan (2026) 2026 deka dipejurai Sapit Premier Sarawak Datuk Amar Douglas Uggah Embas ba bacha keterubah kena 12 Mei lalu bacha kedua enggau ketiga kena 14 Mei tu.
Nangkan nya, RUU Kaunsil Padi enggau Berau Sarawak (2026), ku iya, nya deka dipejurai Menteri Industri Pemakai, Komoditi enggau Pemansang Kandang Menua Sarawak Dato Sri Dr. Stephen Rundi Utom ungkup bacha keterubah, kedua enggau ketiga kena 12 Mei tu.
Ungkup RUU Kaunsil Pemansang Ekonomi Sarawak (Ubah) 2026 nya, iya madah ke nya deka dipejurai Datuk Amar Douglas Uggah pada 12 Mei ungkup ketetiga bacha nya.
Ba lansa sama, Tan Sri Datuk Amar Mohamad Asfia madah, bisi 333 tanya nyerangkung tanya lisan enggau betulis udah diterima ari 39 Kaban Kunsil Nengeri (ADUN).
Ku iya, ari penyampau nya, bisi 254 tanya iya nya saut lisan ngaul 37 ADUN, seraya 79 da nya tanya betulis ari 15 ADUN.
Ku iya agi, Opis Premier Sarawak nerima tanya pemadu mayuh iya nya 50 tanya dibantai.
Aum sekali tu dipun enggau pengawa dipenyadi Yang di-Pertua Negeri Sarawak Tun Pehin Sri Dr. Wan Junaidi Tuanku Jaafar kena 11 Mei 2026.
Bela datai ba aum iya nya dua Sapit Premier Sarawak Datuk Amar Douglas Uggah Embas enggau Datuk Amar Dr. Sim Kui Hian, bala Menteri kabinet Sarawak, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri Kabinet Sarawak, Kaban Kunsil Nengeri sereta bala bukai. - EDISI UKAS
