PBB Sarawak Deka Ngatur Konvensyen Di Empat Zon Bepun Julai Tu
KUCHING: Parti Pesaka Bumiputera Bersatu (PBB) Sarawak deka ngatur konvensyen ba empat zon belabuh ari bulan Julai nyentuk September taun tu dikena negap parti ba renggat baruh.
Sekretari Besai Parti Pesaka Bumiputera Bersatu (PBB) Sarawak ti mega Kaban Parlimen Kapit Dato Sri Alexander Nanta Linggi madah, konvensyen nya deka ngaul empat zon besai iya nya zon selatan, zon Betong, zon tengah enggau zon utara.
“Zon selatan deka betuai ke Datuk Amar Fadillah Yusof, zon Betong ari Datuk Amar Douglas Uggah Embas, zon tengah ari aku empu lalu zon utara betuai ke Datuk Amar Awang Tengah Ali Hasan,” ku iya.
Iya nyebut jaku nya ba aum pemberita pengudah Aum Supreme Kaunsil Parti Pesaka Bumiputera Bersatu (PBB) Sarawak ketiga kali ti betuai ke Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Indu Opis PBB, Jalai Bako kena Hari Enam.
Dato Sri Alexander madah, haribulan ngatur konvensyen ungkup tiap zon apin diputus lalu deka dibantai pengudah aum nyeraris betuai ke Sapit Premier Sarawak Datuk Amar Douglas Uggah ti deka diatur enda lama da.
Ku iya baru, sulu jaku konvensyen nya apin diputus lalu deka dikerandau ba aum nyeraris ti deka diatur nangkan tu,
Nambah ke nya, iya nerang ke konvensyen nya mega nyadi pelasar negap organisasyen parti dikena besikap napi sebarang pekara ti tau nyadi nyengkaum pengawa bepilih dudi hari. - EDISI UKAS
