Hari Indai Peluang Ngenang Jasa Enggau Penyayau Indai
KUCHING: Pengerami ngintu Hari Indai ukai semina pengawa ninting taun, tang mega nyadi peluang beguna ngenang jasa enggau kasih sayau raban indai ba ruang bilik.
Menteri Pemansang Indu, Ruang Bilik enggau Komuniti, Dato Sri Nancy Shukri madah, mensia mayuh meseti ngena peluang serimbai Hari Indai dikena mandangka basa enggau kasih sayau nuju indai.
Ku iya, taja kasih sayau ngagai indai dibantai ninting hari, tang Hari Indai meri besai reti kelai ngenang jasa enggau pengiruh sida.
“Nuju bala anak, kena mih peluang baka Hari Indai tu kelai hari ti besai reti dikena mandangka basa enggau kasih sayau ngagai indai kita.
“Taja kita endang sayau ke indai ninting hari, tang kitai ngena Hari Indai tu nyadi hari ti besai reti dikena ngerami indai kitai,” ku iya.
Iya nyebut jaku nya ngagai pemberita lebuh dirandau maya ngulu Aum Supreme Kaunsil Parti Pesaka Bumiputera Bersatu (PBB) Sarawak ketiga kali di Indu Opis PBB, Jalai Bako kena Hari Enam.
Dato Sri Nancy mega ngelalau bala laki semampai ngenang pengelelak bini ti mangku pengawa nyadi indai ngagai bala anak.
Nambah ke nya, iya madah ke Hari Indai taun tu diintu besuluka jaku “Seteguh Kasih Ibu” renggat nasional kena 10 Mei tu di Dewan Tun Hussein Onn lalu dipenyadi Raja Permaisuri Perak Tuanku Zara Salim.
Iya mega madah, semua nengeri deka ngatur pengerami hari indai nyengkaum Sarawak kena 14 Mei tu. - EDISI UKAS
