KUCHING: Juruaudit ba Sistem Ngatur Kualiti (SPK) MS ISO 9001:2015 meseti ransing bejalaika pengawa enggau bisi integriti dikena negap atur sereta nentuka sistem ngenatai servis perintah mengkang lurus, manah enggau nemban.

Sapit Sekretari Perintah Sarawak (Operasyen), Datu Hii Chang Kee madah, juruaudit enda patut semina tetangkupka peminta audit aja, tang meseti mereti ke sistem, berati ke risiko enggau merambu pengawa ngemanah ti praktikal.

Ku iya, audit ti bisi kualiti meseti ngelui chara “tick the box” nengah pengawa ngemerat penemban sistem enggau empas ngagai pengawa ngenatai servis ke rayat.

“Audit ukai semina ngeripot penanggul, tang mega nyaup negap sistem ngenatai servis,” ku iya.

Iya nyebut jaku nya ba pengawa nutup Woksyop Juruaudit Sistem Ngatur Kualiti (SPK) MS ISO 9001:2015 kena Hari Lima.

Nambah ke nya, iya nyemetak madah ke integriti juruaudit beguna amat kelebih agi lebuh ngatur audit bekaul sukut sensitif baka pekara wang enggau milih pemekal.

Ku iya agi, tetiap atur audit meseti dikenatai chara profesional, bisi fakta enggau bepelasarka bukti ti bisi pengamat.

Iya nyemetak madah, audit ti nemban meseti bepuguka tiga elemen besai iya nya integriti, penemu enggau pemerani profesional.

“Enti nadai integriti, audit lenyau kredibiliti. Enti nadai penemu, audit majak lenyau. Enti nadai pemerani, audit semina nyadi formaliti,” ku iya.

Berebak enggau nya, iya ngelalau semua raban pengatur enggau auditee nerima tetiap audit sereta bejalaika pengawa ngemetul dikena negap budaya ngemanah ba Servis Perintah Sarawak.

Bela datai, Direktor Unit Transfomasyen enggau Inovasyen Sarawak, Superi Awang Said. - EDISI UKAS