KUCHING: Perintah Sarawak semampai nyungkak pengawa ngena perengkaguna di Sarikei baka Dewan Suarah Sarikei ti ulih mai pemaik alai ngatur program perintah, komuniti enggau program bekaul ke bukai.

Sapit Menteri Dagang Temuai, Industri Kreatif enggau Seni Pemerindang Sarawak Datuk Sebastian Ting Chiew Yew madah, taja ekonomi enggau pemansang rama Sarikei majak ngerembai ti ngepun pemnansang infrastruktur bukai nyadi, langgur ngaga palan konvensyen patut diperati silik bekaul guna ke amat, tikas ke engkeman sereta pengulih dikena timpuh lama.

Ku iya, penemu silik sereta runding timpai jauh beguna dikena nentuka semua pengawa ke digaga ulih pulaika penguntung enggau pemaik ngagai rayat sereta nyukung pemansang di menua nya.

"Naka ke diatu, perintah ransing deka ngenegap sereta ngena perengkaguna enggau manah ngambi pulaika penguntung nyengkaum Dewan Suarah Sarikei ke udah disikap enggau pengulih alai ngatur program perintah, komuniti, main asal, seminar tauka program ngempuru mensia mayuh," ku iya madah.

Iya madah munyi nya maya nimbal tanya Kaban Kunsil Nengeri (ADUN) Repok, Dato Sri Huang Tiong Sii ba Aum Kunsil Nengeri (DUN) Sarawak Ke-19, Hari Empat.

Nerang enggau silik ku iya, Dewan Suarah Sarikei ulih alai 700 iti endur duduk, 55 iti meja lalu tu nyadi palan engkeman endur ngatur program di menua nya.

Nitih rikod, bisi 36 program tauka 40 peratus ngena palan nya lalu ke bukai lebih agi digaga ba palan engkah kereta enggau laman.-EDISI UKAS