Projek Padi Hibrid Sarikei Nyaup Nyamin Bekal Pemakai Sarawak
KUCHING: Projek hub umai sereta ngeluar benih padi hibrid di Sungai Loba Pasi, Sarikei dipeda ulih nyaup agenda jamin pemakai di Sarawak.
Kaban Kunsil Nengeri (ADUN) Meradong, Datuk Ding Kuong Hiing madah, projek nya digaga nangkan pemujur projek nguji padi hibrid di Sungai Padi taun 2024 suba.
Ku iya, Onemas Agriculture Sdn Bhd udah bulih pemendar ngaga projek umai nya sepengudah ngenataika langgur projek ngagai Premier Sarawak maya nemuai ngagai taba projek kena 16 Januari 2025.
"Nengah kerejasama LCDA Agri Business Sdn Bhd enggau Onemas Agriculture Sdn Bhd, urung 143.52 hektar pemesai tanah di Sungai Loba Pasi, Sarikei deka dikemansang nyadi hub umai sereta ngeluar benih padi hibrid.
"Inisiatif tu seriris enggau juluk ati perintah ke deka ngenegapka agi jamin pemakai enggau deka ngaga sektor betanam betupi moden," pia ku iya.
Iya bejaku munyi nya maya Aum Kunsil Nengeri (DUN) Sarawak Ke-19 ditu, Hari Tiga.
Iya mega madah, projek nya diatu benung nganti pemendar ari Opis Menteri Industri Pemakai, Komiditi enggau Pemanang Kandang Menua (MFICORD) sebedau ulih berengkah.
Kelimpah ari nya, Datuk Ding andal, pemutus ngemendarka Rang Undang-Undang (RUU) Kaunsil Padi enggau Beras Sarawak 2026 deka muka mayuh agi peluang projek nangkan nya sereta nengkebang kerejasama strategik kaunsil nya enggau pemeranak puku, akademia enggau penyedia teknologi.
Ku iya, kerejasama nya besai reti dikena ngerembaika pengawa bekenaka teknologi moden baka mekanisasi, sistem entali ai pintar, teknologi dron sereta betanam betupi moden ti engkeman dikena nitih gaya tanah di Sarawak.
"Onemas Agriculture Sdn Bhd udah mandangka pengeransing nyaup Sarawak bulih 60 peratus tikas ngidupka diri beras manggai taun 2030.
"Nya alai, aku ngarap opis menteri bekaul ulih ngemendarka projek tu digaga enggau lengkas," ku iya madah baru.
Datuk Ding madah, projek nya ila ukai semina nyaup pemansang padi hibrid di Meradong tang bela deka nentuka kompeni nya nyadi 'anchor farmer' ba pengawa nyaup orang bumai mit nengah pengawa bekunsi pengelandik teknikal enggau betanam betupi moden. -EDISI UKAS
