Kaban Kunsil Nengeri (ADUN) Balingian, Abdul Yakub Arbi madah, pekara nya besai reti dikena ngenegap pengulih perintah ngatur rayat lalu nipak nama ke diguna rayat di menua.
Ku iya, Sarawak diatu ba renggat bejadika semua tuju Pelin Pemansang Udah COVID-19 (PCDS) 2030 ti mungkur pemansang ekonomi baru, transformasyen digital, pemansang menua pesisir sereta nyungkak tikas pemanah ngatur menua.
"Semua tuju tu begunaka sistem ngenatai servis perintah ti lebih agi sikar, semak enggau rayat sereta responsif ba nama ke diguna rayat," ku iya.
Iya bejaku munyi nya maya Aum Kunsil Nengeri (DUN) Sarawak Ke-19, Hari Tiga.
Yakub Arbi mega madah, pemesai menua Sarawak nejuka sitak DUN diatu patut dibagi bagi baru ke dilawa nyentuk bejam-jam baik nya nengah darat tauka sungai.
Berindik ari nya, ku iya, struktur pengari politik ke bisi patut digaga baru nitihka guna maya hari ngambika seraka pemansang menua pesisir enggau mengeri ulih disempilka agi.
"Enti mit agi, lantang agi pengari rayat bejalaika tanggungpengawa lalu pia mega isu ke bisi nyadi ba rayat deka muntang agi diputar," ku iya madah baru. -EDISI UKAS
