KUCHING: Kunsil Nengeri (DUN) Sarawak udah ngemendar Rang Undang-Undang (RUU) Bekal Tambah (2026) sepenyampau RM1.323 bilion dikena ngenegapka agi pemansang nengeri, pengelantang rayat enggau ngatur macham inisiatif strategik perintah.
RUU nya dipejurai Sapit Premier Sarawak ke mega Menteri Pekara Wang enggau Ekonomi Baru II Datuk Amar Douglas Uggah Embas dikena nambah belanja opis menteri enggau opis perintah nengah Langgur Belanja Tambah Keterubah 2025.
Ku iya, ari penyampau nya, RM1 bilion diungkup ngagai Opis Sekretari Pekara Wang ke nyadi saup ngagai Kumpulan Wang Berkanun dikena nambah belanja pemansang nengeri.
"Kelimpah ari nya RM188 juta diguna Opis Menteri Utiliti enggau Telekomunikasyen dikena meri diskaun 25 peratus bil karan ungkup penguna domestik ti deka nyaup ngurangka tating belanja pengidup ketegal penyarut ke nyadi di Timur Tengah," ku iya maya bejuraika RUU nya ba Aum DUN Sarawak Ke-19 ditu, Hari Empat.
Iya mega madah, RM90 juta dikena Opis Premier Sarawak nyengkaum RM40 juta ungkup elaun Tuai Genturung Pendiau enggau Komiti Pemansang enggau Pengelikun Genturung Pendiau (JKKK) ke udah dikemendarka Kabinet kena 18 November 2025.
Ku iya, RM50 juta deka dikena mayar suwa begunan opis perintah.
Kelimpah ari nya, RM20 juta agi diungkup ngagai Opis Menteri Raban Nembiak, Lumba enggau Pemansang Orang Dagang dikena nyikap kontinjen Sarawak ngambi bagi ba Lumba Malaysia (SUKMA) XXII Selangor 2026.
Opis Menteri Pengerai Mensia Mayuh, Pengawa Berumah enggau Perintah Menua nerima belanja tambah RM13.34 juta nyengkaum RM7.99 juta dikena nambah elaun tetap khas ninting bulan enggau perengkaguna perubat ungkup kaunselor ba 27 opis bekuasa menua.
Ku iya, sepenyampau RM5.35 juta diungkup dikena meri bantu wang khas diskaun 50 peratus suwa pasar enggau kedai enggi opis bekuasa menua.
Berebak enggau nya, DUN Sarawak bela ngemendarka Langgur Belanja Pemansang Tambah Keterubah 2026 sepenyampau RM391 juta ti mungkur lima subaktiviti enggau sub-sub aktitiviti pemansang.
Datuk Amar Douglas Uggah madah, ari penyampau nya, RM140 juta diungkup ngagai Opis Premier Sarawak nyengkaum RM100 juta dikena ngaga macham Projek Rayat di selampur nengeri.
"RM40 juta agi diungkup dikena nambah Bantu Barang Diguna Sarawak (SKAS) ti deka nyaup ngurangka tating belanja pengidup ketegal penyarut ke nyadi di Timur Tengah," ku iya madah baru.
Iya madah, Opis Menteri Infrastruktur enggau Pemansang Penyangkai Kapal Sarawak bela nerima agih RM50 juta lalu Opis Menteri Utiliti enggau Telekomunikasyen nerima RM66 juta nyengkaum RM46 juta dikena mayar kontrak Projek Bekal Ai Serian Renggat II enggau RM20 juta ungkup langgur projek loji ai baru Lundu.
Sepenyampau RM35 juta diungkup ngagai Opis Menteri Raban Nembiak, Lumba enggau Pemansang Orang Dagang Sarawak dikena mayar kontrak projek nyerenih enggau ngadu Stadium Sarawak.
Opis Sekretari Pekara Wang Sarawak bela nerima agih belanja RM100 juta agi ungkup Turu Bantu Pemansang Khas ngatur macham program rama enggau projek pemansang di selampur nengeri. -EDISI UKAS
