SIBU: Direktor Unit Komunikasi Awam Sarawak (UKAS), Awang Putrayusrie Awang Redzuan ngelimpang awak diri ngabas Pendam Bujang Berani Rosli Dhobi ba pelaman Masjid An-Nur Sibu, kena Hari Enam.

Tuju iya kia dikena meri basa ngagai bujang berani kemerdekaan Sarawak ti ditumbak begulai enggau tiga da bakih iya nya Awang Ramli Amit, Bujang Suntong enggau Morshidi Sidek.

Ba pejalai ngabas pengelama urung 20 minit nya, Awang Putrayusrie mega macha surah Al-Fatihah sereta besampika semengat keempat bujang berani nya diau likun enggau lantang.

Iya disempulang Tuai Penulung Direktor UKAS, Joachim Paggang Jabong, Awangku Hazwan Awg Habuan sereta dua pegawai UKAS Bagi Menua Sibu iya nya Awang Julaihi Awang Ali Bohan enggau Khalid Zaini.

Dulu ari nya, Awang Putrayusrie datai bejadi Program Hari Begulai Enggau Penguna diatur Seksyen Atur Talikhidmat UKAS, Opis Premier Sarawak di Balai LAKIS Sibu sepiak pendam bujang berani nya.

Program nya disempulang Tuai Raban Bansa enggau Tuai Komuniti (KMKK) ari Bagi Menua Sibu dikena nambah penemu bekaul servis ti disediaka Perintah Sarawak sereta nerang ke aplikasyen Talikhidmat nyadi pelasar ngenatai sebana enggau timbal rayat. - EDISI UKAS