SIBU: Tuai Raban Bansa enggau Tuai Komuniti (KMKK) dipinta bejimat meri timbal ba media rama, kelebih agi ngaul isu sensitif bekaul raban bansa, pengarap enggau institusyen diraja (3R).

Direktor Unit Komunikasi Awam Sarawak (UKAS) Awang Putrayusrie Awang Redzuan madah, sida semampai matau isu ti nyadi nyengkaum ba pelasar digital nentuka nadai tuai renggat baruh ngerembai penerang ti enda betul tauka sensitif.

“Aku ngelalau KMKK sensitif agi meri timbal ba media rama bekaul pekara ti apin temu pengamat.

“Kitai kala mendingka kes KMKK ba siti endur meri timbal ti enda engkeman nyentuk nyadi isu enggau nanggul sida empu.

“Aku pechaya KMKK nya sebagi ari staf perintah lalu kitai endang diperati Perintah Sarawak nengah media rama,” ku iya.

Iya nyebut jaku nya lebuh bejadi Program Hari Begulai Enggau Penguna diatur UKAS, Opis Premier Sarawak di Balai LAKIS Sibu, kena Hari Enam.

Nambah ke nya, iya nyemetak madah ke tuai ba renggat genturung pendiau enggau rumah panjai berati ke pengamat sesebengkah penerang ti diterima nengah aplikasyen WhatsApp tauka YouTube sebedau bekunsi ngagai orang bukai.

Berebak enggau nya, Awang Putrayusrie minta KMKK bemalinka pelasar rasmi baka UKAS dikena ngulihka penerang ti betul kelimpah Opis Pemadah Malaysia, TVS enggau RTM.

“Sebedau kitai nekan telefon binching meri timbal, kitai meseti nyidi dulu sekali ke penerang nya betul tauka enda. Enti enda temu pengamat, anang bekunsi ke berita nya,” terang iya.

Kelimpah isu media rama, iya mega nyemetak madah ke pemesai guna ngena aplikasyen Talikhidmat nyadi pelasar rasmi mantaika sebana ti manah agi dibanding mantaika sebana terus.

Ku iya, sistem nya nentuka UKAS matau penyulut agensi perintah ke alai tiap sebana tauka tanya mensia mayuh meseti diadu ba timpuh 14 hari.

“Enti pengudah 14 hari nadai atur dipejalai, UKAS deka matau kebuah agensi nya enda meri timbal lengkas.

“kena mih pelasar tu ukai semina mantaika sebana, tang mega ungkup perambu pemansang enggau ngenang agensi ti udah gawa enggau manah,” ku iya.

Iya mega ngelalau komuniti di Sibu ngambi sedia nyerumba dua pengerami besai iya nya Program Sarawakku Sayang kena 26 Jun 2026 enggau Hari Sarawak kena 22 Julai tu ti deka diatur ba mengeri nya.

Sama datai, pengari Opis Pelilih Sibu Elizabeth Pius Kuha; Penulung Direktor (Pengatur Bagi Menua) Service Sarawak Sibu Juliana Apa, Tuai Penulung Direktor UKAS Joachim Paggang Jabong enggau Temenggong Stanley Geramong Bandar.-EDISI UKAS