BETONG: Rebak biak meseti diberi peluang mangku pengawa nyadi tuai ba mayuh renggat nyengkaum di rumah panjai nentuka pemansang komuniti ditampung dudi hari.
Sapit Menteri Nembiak, Lumba enggau Pemansang Orang Dagang Sarawak ti mega Kaban Kunsil Nengeri (ADUN) Layar Datuk Gerald Rentap Jabu madah, rebak biak ngembuan pengulih, pengelandik sereta pemereti ati ti ulih mai komuniti ngagai tikas ti tinggi agi.
“Rebak biak meseti diberi peluang enggau awak laban entara sida nya mega bisi pemereti ati enggau pengelandik dikena nyapai tikas ti tinggi agi,” ku iya.
Iya madah munyi nya sebedau bejadi Pengawa Merarau serimbai Pengerami Ngintu Jubli Perak 25 Taun Gerempung Indu Gensurai (Serakup Indu Gensurai Layar) ti diatur di Rumah Panjai Gensurai, ditu kena Hari Enam.
Nambah ke nya, Datuk Gerald mega muji semangar kerejasama enggau peneguh Gerempung Indu Gensurai ti diatu udah nyingkang ngagai serak ketiga kenyau ari ditumbuh 25 taun ti udah.
Ku iya, pemujur nya mandangka semangat penyerakup enggau kerejasama dalam komuniti ulih nentuka sesebengkah organisasyen terus teguh sereta relevan ba pemansang komuniti menua.
Nangkan nya, Kaban Parlimen Betong Dato Dr Richard Rapu ngelalau gerempung indu terus negapka diri ba bidang teknologi pemadah enggau makit digital nengah latih ti disediaka di institusyen baka Palan Penyulut Teknologi Sarawak (CENTEXS) enggau Palan Ngerembai Penerang Nasional (NADI).
“Nyadi gerempung indu, pangku pengawa disan kita beguna endar dikena nambah penatai pemisi ruang bilik diri lalu ngena awak sereta peluang ti bisi,” ku iya.
Kelai sukung ngagai gerempung indu, iya mega ngemendar pemeri RM5,000 ngagai Gerempung Indu Gensurai dikena ngemujur aktiviti krafjari.
Pengawa diatur Komiti Pemansang enggau Pengelikun Genturung Pendiau (JKKK) begulai enggau Gerempung Indu Gensurai nya mujur ngempuru peranak ari 47 rumah panjai ke alai 92 mija mujur dijual sepanjai program nya.
Bela datai, Residen Bagi Menua Betong Datu Richard Abunawas sereta Pegawai Pelilih Betong Laga Kueh.-EDISI UKAS
