TARAT: Pengawa nguasa Sains, Teknologi, Injiniring enggau Matematik (STEM) enggau Jaku English meseti nyadi agenda besai rayat Sarawak nentuka nengeri tu ngembuan pengereja bisi kualiti sereta ulih tetangkupka peminta industri global ti deras mansang.

Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn madah, rakyat Sarawak meseti nambah pengawa nguasa Jaku English nentuka sida besemekih ba makit kereja global sereta ngerebut peluang gawa asil penatai pengawa meranak puku luar ke nengeri tu.

Ku iya, Jaku English diatu nyadi jaku penemu, teknologi enggau sains kelebih agi diatu Sarawak majak narit perati pemeranak puku antarabansa nyengkaum ari Jepun, Korea Selatan, Jerman enggau Singapura.

Iya mega meransang apai indai sereta aki enggau ini neleba kediri ngena Jaku English ba rumah laban chara nya ulih nyaup rebak biak landik agi ngena jaku nya.

“Enda ngawa ngena ‘broken English’, pemadu beguna anak berani bejaku enggau neleba kediri ngena jaku nya,” ku iya lebuh Pengerami Makai Lemai“Mad Kasah” diatur Gerempung Indu Kampung Pesang di Balai Mayuhguna Tapah, Siburan kena Hari Enam.

Nambah ke nya, Kaban Kunsil Nengeri (ADUN) Tarat nya ngelalau mensia mayuh meri perati ngagai bidang STEM iya nya sains, teknologi, injiniring enggau matematik dikena nempa pengereja landik ti diguna industri dudi hari di Sarawak.

Ku iya, Perintah Sarawak diatu nyendia pelajar tinggi pechuma ngaul 64 kus ba universiti enggi Sarawak nyengkaum Swinburne University of Technology Sarawak Campus, Curtin University Malaysia, University of Technology Sarawak enggau ICATS University College.

Ku iya, ICATS University College diatu mega nyendia kus injiniring singka miga nyengkaum pemansang satelit nano ti deka nyukung inisiatif Sarawak negap arus internet, matau penusah ngenyit sereta ngintu pemansut nengeri.

Pia mega, ku iya, Sarawak begunaka mayuh lutur, lutur veterinar, akauntan, pakar kewangan, injinir enggau saintis dikena nangkup peminta pemansang nengeri ti deras mansang.

Ba pekara bukai, iya madah, pengawa numbuh kompeni bilun AirBorneo mega deka ngerandang mayuh agi peluang gawa ngagai rayat Sarawak, tang nyemetak madah ke pengawa nguasa Jaku English beguna amat nyengkaum ungkup kru bilun enggau kru teknikal.

Iya mega minta rebak biak ngena pelajar teknikal enggau vokasional laban bidang nya nyendia mayuh peluang gawa sereta begaji besai. - EDISI UKAS