KUCHING: Pengelebih Sarawak napi pemar ekonomi enggau ubah landskap kereja kemaya hari bepanggai ba modal mensia ti bekualiti, landik sereta beretan.
Sapit Menteri ba Opis Premier Sarawak (Pengereja Kasar, Imigresyen enggau Patau Projek), Datuk Gerawat Gala madah, Perintah Sarawak mengkang keran negap pengereja pengawa nengah tiga pugu ti ngemerat pemansang modal mensia enggau ngansah pengelandik.
Ku iya, tiga pugu nya nyengkaum nambah peluang gawa bepuguka pengelandik, negap agenda ngansah pengelandik pengereja pengawa sertea nentuka rayat Sarawak gawa ba sektor strategik nengah inisiatif baka Komiti Lokalisasyen Pengereja Pengawa.
Iya nyebut jaku nya ba Pengerami Ngintu Hari Pengereja 2026 Renggat Sarawak ti dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Palan Konvensyen Borneo Kuching (BCCK) ditu, kena Hari Minggu.
Ku iya, sulu jaku taun tu iya nya ‘Pengereja Nyulut, Sarawak Maju Lantang’ mai pesan senentang pengereja nyulut ukai semina ditisih bepelasarka penyulut ari Tikas Penyulut Besai (KPI), tang mega meseti ngembuan integriti, berani ngaga inovasyen sereta ulih neleba kediri ba jeman digital enggau automasyen.
Nambah ke nya, Datuk Gerawat mega madah, Sarawak udah nurai sejarah nengah ubah Ordinan Buruh Sarawak ti mandangka pengeran perintah nempa ekosistem pengereja ti asi enggau progresif agi.
Ku iya, entara pekara ti dikemanah ti dipejalai nyengkaum ngelanchar kemisi beranak ari 60 ngagai 98 hari, bejalaika kemisi paterniti pengelama tujuh jam, nginsur jam gawa ninting minggu ari 48 ngagai 45 jam sereta bejalaika atur gawa fleksibel.
Pia mega, ku iya, perintah bejalaika standard endur diau pengereja sereta neritka atur anti-diskriminasi dikena nyaga pengelantang pengereja pengawa.
