KUCHING: Perintah Sarawak ngelanchar pelasar digital JobSarawak dikena negap sistem kereja sereta nyendia data makit gawa nipak peminta ekonomi kemaya hari enggau agenda transisyen ekonomi nengeri.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pelasar nya dikemansang berindik ari peluang gawa ti nambah enggau pengawa puang asil pemansang ekonomi Sarawak diatu.
Ku iya, Unit Atur Imigresyen enggau Pengereja Kasar (ILMU) mega mujur ngemansang siti dashboard ti meri penerang bekaul gaya kereja sereta peminta pengereja pengawa nitih bidang ti diguna pengaji di Sarawak.
“Kitai begunaka sekeda pengelandik. Tadi bisi nyebut pengereja ti bisi latih nambah pengelandik nyengkaum sida ba bidang PhD, ekonomi tauka pengereja landik.
“Aku ngasai ke selinting kitai ba taun 2030 enggau ngelui ari nya laban kitai ba transisyen ekonomi nyengkaum bekaul kereja singka miga ti benung ditungkap kitai diatu lalu mega bidang chip lalu tu udah tentu deka nyendia kereja landik ba bidang nya,” ku iya.
Iya nyebut jaku nya lebuh dirandau pemberita pengudah Pengerami Ngintu Hari Pengereja 2026 Renggat Sarawak di Palan Konvensyen Borneo Kuching (BCCK), ditu kena Hari Minggu.
Ngenang silik, ku iya, inisiatif nengah JobSarawak jauh manah agi dibanding sistem ti dulu laban ulih nyendia data ti betul agi enggau diguna dikena nempa peluang gawa ti setipak enggau misyen transisyen ekonomi Sarawak.
Ku iya agi, sistem begulai nya mega nyempil kaul entara perintah enggau pengaji, kelimpah ngemuntang rayat Sarawak akses penerang pengawa puang sereta minta kereja terus nengah pelasar nya.
Dulu ari nya, Premier Sarawak mega bejadi simbolik ngelanchar JobSarawak serimbai pengawa nya. - EDISI UKAS
Pemberita : Ahmad Daniel Faiz
Gambar: Ibanez Jeffery
