KUCHING: Inisiatif berani Sarawak nyerungkai ekonomi hidrogen diatu berengkah mansutka asil lebuh rega seliter hidrogen diripotka murah agi dibanding diesel lalu mandangka strategi idar kuasa gadung nengeri tu ba pelasar ti betul.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, taja inisiatif bejalaika hidrogen sebedau tu kala nerima mayuh pejah enggau penangi, pemansang ekonomi kemaya hari nunjukka nengeri tu enda ulih terus bepanggai ba siti pemansut kuasa aja.

“Lebuh keterubah aku nerang enggau deka bejalaika hidrogen suba, aku nerima mayuh jaku pejah laban mayuh orang agi nangi senentang rega hidorgen jauh mar agi.

“Bala menyadi, peda mih sehari tu rega diesel enti dibanding enggau hidrogen, seliter hidrogen murah agi ari diesel,” ku iya nyemetak.

Iya nibar jaku nya ba Pengerami Ngintu Hari Pengereja 2026 Renggat Sarawak di Palan Konvensyen Borneo Kuching (BCCK), ditu kena Hari Minggu.

Ku iya, pemujur nya mandangka pemerani nyerungkai teknologi enggau pemansut ekonomi baru ulih ngerandang peluang besai agi ngagai pemansang Sarawak dudi hari.

Nambah ke nya, Datuk Patinggi Abang Zohari mega ngelalau anak Sarawak berani enchabar diri lalu ngerebut peluang baru ti ayan nipak ubah landskap ekonomi global.

“Kitai meseti berani lalu aku nemu anak Sarawak endang berani, tang pemerani nya anang sengaja lalu meseti ngena pemintar runding enggau ngira‘calculated risk’ sereta nitih pematut,” ku iya

Iya nyemetak madah, inisiatif berani tang ngira strategik nya beguna amat nentuka Sarawak meruan besemekih sereta ulih nyadi pengemudi ekonomi gadung enggau kuasa dudi hari di rantau tu. -EDISI UKAS

Pemberita : Jonnie Kiew
gambar : Ibanez Jeffery Guang