Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, iya andal ke semua penyampau tubuh 2.8 juta rayat nengeri tu ulih nyapai pemujur ba bidang ti dipilih sida.
“Taja penyampau tubuh peranak Sarawak semina 2.8 juta, anang irau laban 2.8 juta nya deka nyadi komuniti ti pintar enggau landik laban kitai deka nempa pengereja Sarawak ti pakar ba bidang sereta ngemansang industri ti nyendia besai gaji,” ku iya.
Iya nibar jaku nya lebuh bejadi Pengerami Ngintu Hari Pengereja 2026 Renggat Sarawak ti diatur ba Palan Konvensyen Borneo Kuching (BCCK), ditu kena Hari Minggu.
Ngenang pekara nya, Datuk Patinggi Abang Zohari nerang ke inisiatif perintah nyendia peluang gawa baru ti nyendia besai gaji nya dikena nyebela belanja idup diatu.
“Nya kebuah, bala pengereja meseti ditipak enggau pengelandik sereta produktiviti sida dikena nangkup peminta ti bisi disedia,” ku iya nyemetak.
Iya madah baru, Perintah Sarawak udah nyendia jalai nyengkaum nyendia pelajar pechuma, nerang ke teknologi moden, digitalisasyen sereta kus khas ungkup anak Sarawak.
Berebak enggau nya, iya ngarap ke raban nya ulih ngena peluang ti bisi dikena nyungkak ekonomi enggau servis ba nengeri tu. - EDISI UKAS
