Hak Pengereja Sarawak Terus Dijaga Bepelasarka Undang-Undang
KUCHING: Hak pengereja di nengeri tu deka terus dijaga bepelasarka undang-undang nentuka pengelantang sida terus dijaga nipak ubah pemadu baru.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, nengeri tu udah ngemendar ubah dikena ngempung hak pengereja nengah Ordinan Buruh Sarawak enggau Akta Persekutuan.
“Kitai begulai ngempung hak Sarawak nengah Ordinan Buruh Sarawak enggau Akta Persekutuan nentuka hak pengereja di Sarawak terus ditan seraya ngira undang-undang menua sereta standard ‘International Labour Organization’ (ILO) Gerempung Bansa Beserakup (PBB),” ujar beliau.
Iya nibar jaku nya ba pengawa bejadi Hari Pengereja 2026 Renggat Sarawak di Palan Konvensyen Borneo Kuching (BCCK), ditu kena Hari Minggu.
Premier Sarawak mega madah, pengawa ngena Akta Pekerja Gig terus mega nyaga pengereja ti ngena teknologi digital, seriris enggau transfomasyen Sarawak nuju ekonomi digital.
Ba pengawa nya, Datuk Patinggi Abang Zohari mega ngemata pengawa besilih dokumen Sempekat Pemereti Ati (MoU) entara Perintah Sarawak enggau Gerempung Pengelikun Rama (PERKESO) sambil nyua Anugerah Pengereja Nyulut ngagai bala penerima.
Bela datai, Sapit Premier Sarawak Dr Sim Kui Hian, bala Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, Sapit Menteri Pengereja Pengawa Datuk Khairul Firdaus Akbar Khan, Sapit Menteri ba Opis Premier Sarawak (Pengereja Kasar, Imigresyen enggau Patau Projek) ti mega Chairman Pengawa Ngintu Hari Pengereja 2026 Renggat Sarawak Datuk Gerawat Gala, bala Sapit Menteri, Sekretari Besai Sarawak Dato Ahmad Nadzri Mohd Hassan, sereta bala tuai opis. - EDISI UKAS
