KUCHING: Kunsil Nengeri (DUN) Sarawak udah ngemendarka Rang Undang-Undang (RUU) Bekal Tambah (2025) 2026 ti bekenaka belanja tambah sepenyampau RM167,808,725 dikena nentuka pemujur servis perintah enggau program pemansang perintah.
Pemutus nya digaga ba Aum DUN Sarawak Ke-19 alai enggau nya, perintah nengeri nambah belanja opis menteri enggau opis perintah ke nadai tauka enda chukup agih ba Langgur 2025.
Sebedau nya, Sapit Premier Sarawak ke mega Menteri Pekara Wang enggau Ekonomi Baru II, Datuk Amar Douglas Uggah Embas bejuraika RUU nya ba bacha kedua lalu nerang belanja tambah nya dikena nyaup melanja ungkus ungkup macham servis ke digaga agensi perintah.
"Agih tambah tu deka nentuka semua servis perintah semampai ulih dikemujurka ungkup pengelantang rayat," pia ku iya.
Kelimpah ari nya, DUN Sarawak mega ngemendarka mosyen bekaul Langgur Tambah Kedua Belanja Pemansang 2025 ngagai Komiti Bekal ti bekenaka agih manggai RM26,089,146.
Ari penyampau nya, projek khas nerima agih pemadu besai iya nya lebih RM17.7 juta, ditangkan pemansang mensia mayuh bepenemu (K-Society), lebih RM6.38 juta.
Bela nerima agih iya nya sektor infrastruktur darat enggau sungai, begunan perintah, utiliti, pemansang industri, opis bekuasa menua enggau pengawa berumah kelimpah sektor dagang temuai, betanam betupi, pengeraja asal enggau rampa menua, parit, entali ai sereta pengangkut. -EDISI UKAS
