National Geographic Learning Nyukung Agenda Pelajar Gadung Sarawak
KUCHING: National Geographic Learning nyukung inisiatif Perintah Sarawak ba agenda pelajar gadung enggau penemu bekaul ubah klimet.
Direktor Kanan ke mega Tuai bagi Rantau Asia National Geographic Learning, Micheal Cahill madah, sukung nya bekaul pelajar STEM, teknologi enggau pemeruan rampa menua di nengeri tu.
Ku iya, sida diatu benung bekerejasama enggau bala pengajar sereta komuniti di selampur Sarawak dikena nambah penemu bekaul ubah klimet, pemeruan enggau pelajar gadung.
"Ba National Geographic Learning, tuju kami iya nya deka mai dunya ngagai bilik kelas enggau komuniti di selampur Sarawak.
"Seraya nya, kitai deka mai Sarawak datai ba renggat dunya," ku iya.
Iya bejaku munyi nya maya dirandau media sepengudah ngatur penemuai basa ngagai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ditu, Hari Empat.
Iya mega madah, sida bela ngelaluka penatai Premier Sarawak nemuai ngagai indu opis National Geographic Learning di Amerika Syarikat enggau China ngambi ulih bekunsika pemujur Sarawak ngerekaika penemu bekaul ubah klimet enggau pemeruan.
Nangkan nya, Direktor Pengatur National Geographic Learning, Charles Shim madah, sida udah ngatur program National Geographic Learning ba sekula di selampur Sarawak kenyau ari taun 2018 ari prasekula, sekula primeri enggau sekula sekondri.
Ku iya, program nya lebih agi bekaul STEM, teknologi enggau 'artificial intelligence' (AI).
"Penatai kami sehari tu deka nerang ngagai Premier Sarawak bekaul nama ke udah digaga sereta pengulih nempa kerejasama enggau Perintah Sarawak dikena ngenegapka agi tikas pengulih belajar STEM lebih agi ba bidang sains enggau teknologi," ku iya madah.
Bela datai maya nya Menteri Pelajar, Inovasyen enggau Pemansang Pengelandik Sarawak Dato Sri Roland Sagah Wee Inn enggau Sekretari Perintah Sarawak, Datuk Amar Mohamad Abu Bakar Marzuki.-EDISI UKAS
