Entara agensi pengelikun enggau penerit adat ti nerima pemeri nya baka Raban Soldadu Malaysia (ATM), Polis Diraja Malaysia (PDRM), Opis Bomba enggau Penyah Penusah Malaysia (JBPM), Agensi Penerit Adat Maritim Malaysia (APMM) sereta Opis Kastam Diraja Malaysia (JKDM).
Bela nerima pemeri OpisImigresen Malaysia (JIM), Opis Pengangkut Darat (JPJ), Opis Rumah Jil Malaysia (JPM), Raban Penyaga Orang Periman Malaysia (APM), Opis Voluntia Malaysia (RELA) enggau Unit Pengelikun enggau Penerit Adat Sarawak (UKPS).
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, tetiap pek pemakai nya ngundan enam bansa produk nyengkaum pemakai tau diempa terus, kuih deram, kachang, mi kolok sereta ai kupi enggau teh tiga dalam satu.
“Kitai ngarap ke pek ti dikunsi enggau bala raban nyaga pengelikun sereta raban beruniform sekumbang musim pengerami ulih ngasai ke penyiru Perintah Sarawak.
“Pek Sumbangsih Taun Baru China, Sumbangsih Hari Raya Aidilfitri enggau Sumbangsih Gawai mega dikearap ulih ngasuh sida ransing agi gawa nentuka kedaulatan Sarawak, Sarawak likun enggau lantang,” ku iya.
Iya nyebut jaku nya ba Pengerami Simbolik Nyua Sumbangsih Hari Gawai 2026 di Kunsil Nengeri (DUN) Sarawak, ditu, Hari Empat.
Ngenang silik, iya madah ke penyampau semua pek pemakai disedia ungkup ketetiga program Sumbangsih taun tu bisi 35,700 pek. -EDISI UKAS
