SIBU: Parti Demokratik Progresif (PDP) deka majak ngenegapka pengawa ditegika parti bepelasarka prinsip kaul begempung, bekunsi kuasa enggau seruran gawa ke rayat.
Presiden PDP, Dato Sri Tiong King Sing nyemetak madah, semua bala tuai enggau kaban parti patut majak bejalaika pengawa dilempai kelimpah seruran mereti ke peminta rayat.
Ku iya, Aum Besai Tiga Taun Sekali (TGA) PDP 2026 ukai semina pelasar formaliti organisasyen aja, tang nyadi kelang ‘ngemau baru’ semangat parti dikena ngayanka sida endang pelasar politik dudi hari.
“Ngagai semua kaban, paju ke pengawa ditegi. Ngagai bala tuai, kereja pengawa enggau tanggungpengawa lalu ngagai rayat, pechaya mih PDP deka majak gawa enggau berani sereta lurus.
“Ngagai bala bakih parti ba gempung, aku deka nyemetak madah, PDP tetap bepegai teguh ngagai prinsip begempung, bekunsi kuasa enggau bela bebasa,” ku iya ba jaku ngelalau rambau Pengawa Bejadi TGA PDP 2026 di Hotel Kingwood, kena Hari Enam.
Pengawa nya udah dipenyadika Premier Sarawak ke nyadi Presiden Gabungan Parti Sarawak (GPS) Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
Dato Sri Tiong ke mega Menteri Dagang Temuai, Seni enggau Budaya madah, kenyau ari ditumbuh ba taun 2002, nyengkaum mali baru nama taun 2017, PDP majak ngerembai lalu diatu bisi 250,000 kaban di selampur Sarawak.
Ku iya, pekara nya ngayanka pengandal rayat ngagai pengawa ditegi enggau pangku pengawa PDP nyadi siti ari komponen beguna dalam GPS.
Berebak enggau nya, iya mega nyemetak madah, PDP tetap begulai enggau GPS sereta nyukung tegut Premier Sarawak nentuka politik tegap enggau pemansang ekonomi nengeri majak ditegap.
Pengawa nya mega digulu Menteri ba Opis Premier Sarawak ke mega Presiden Parti Rakyat Sarawak (PRS) Dato Sri John Sikie Tayai sereta Sekretari Besai Parti Pesaka Bumiputera Bersatu (PBB) ke mega Sekretari Besai GPS Dato Sri Alexander Nanta Linggi.
Sama datai, Sapit Menteri Pengawa Berumah, Pengerai Mensia Mayuh enggau Perintah Lokal Datuk Michael Tiang Ming Tee ke ngari ke Presiden Parti Rayat Sa’ati Sarawak (SUPP), Sekretari Besai PRS Datuk Dr. Malcom Mussen Lamoh, Sapit Presiden PDP Datuk Henry Harry Jinep, Mandal Presiden Kanan I PDP Datuk Dr. Penguang Manggil sereta Sekretari Besai PDP Anyi Ngau.-EDISI UKAS
