Penanggul Suntuk Kapasiti Di Hopital Besai Sarawak Patut Diberi Perati
KOTA SAMARAHAN: Penanggul suntuk kapasiti ke majak raya ba hospital besai nengeri tu begunaka perati lebih agi ari sukut agih belanja enggau pengereja pengerai.
Sapit Premier Sarawak ke mega Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Amar Profesor Dr Sim Kui Hian madah, fasiliti pengerai di Sarawak mayuh nadai nyengkaum suntuk pengereja dibanding hospital di Semenanjung Malaysia.
Ku iya, hospital besai di Sarawak lebih agi Hospital Besai Sarawak (HUS) napi pesakit kelalu mayuh nyentuk unit imijensi suah ngelui ari kapasiti.
“Enti bisi pematut agih belanja dikurang, Sarawak enda patut nyadi nengeri keterubah nerima pekara nya laban nengeri tu udah kelalu lama napi penanggul suntuk pengereja enggau kapasiti fasiliti pengerai,” ku iya.
Iya nyebut pekara nya lebuh dirandau media pengudah ngulu Konvensyen Antarabansa Nembiak Nyadi Indu Misi Ke-4 2026 (4th INSC 2026) di Universiti Malaysia Sarawak (UNIMAS), kena Hari Enam.
Ku iya, hospital ngembuan kapasiti 1,000 katil di Semenanjung Malaysia bisi penyampau staf mayuh agi dibanding hospital enggau kapasiti sama di Sarawak ke alai nya meri empas besai ngagai staf pengerai ke nyaga kelalu mayuh pesakit ketegal suntuk orang gawa.
Berindik ari nya, iya ngarap ke Perintah Besai ulih berunding enda ngachau sektor pengerai di Sarawak ba pengawa ngelimat belanja sida laban nengeri tu agi tubah begunaka fasiliti enggau pengereja. -EDISI UKAS
