SIBU: Penyerakup parti komponen Gabungan Parti Sarawak (GPS) nyadi akar negap politik enggau pemujur pemansang ekonomi Sarawak.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, GPS ke datai ari parti-parti lokal Sarawak majak ransing ngetan hak nengeri ari baruh Sempekat Malaysia 1963 (MA63) nengah randau diatur belama begulai enggau Perintah Besai.

“Kitai enggai lebih sereta enggai mega kurang. Kitai semina deka ke nama ke udah disempekat lebuh Malaysia ditumbuh,” ku iya.

Iya nibar ke jaku nya ba Aum Besai Tiga Taun Sekali (Bepilih) 2026 Parti Demokratik Progresif (PDP) ditu, Hari Enam.

Premier Sarawak madah, pengering ekonomi nengeri ngasuh perintah ulih bejalaika mayuh polisi ngira rayat nyengkaum pelajar tinggi pechuma ungkup anak Sarawak.

Ku iya, polisi nya diberi ngagai semua rayat nadai ngira raban bansa tauka pengarap seagi sida ngembuan identiti Sarawak.

“Penanggul belanja badu agi nekul anak Sarawak nampung pelajar ke universiti laban perintah GPS deka mantu,” ku iya.

Iya madah baru, polisi nya ulih dipejalai ketegal penuduk pekara wang Sarawak ke tegap asil chara ekonomi ke strategik enggau berani.

Ku iya, perintah nengeri mega mujur nambahka asil nengeri ari urung RM6 bilion ngagai RM14 bilion ari pengawa ngatur pengeraja asal ke nemban agi nyengkaum ba sektor minyak enggau gas.

Premier Sarawak mega nyemetak madah, nengeri tu enda ulih kelalu bepanggai ba ekonomi lama aja, tang patut nyingkang nuju ekonomi dudi hari bepuguka teknologi enggau kuasa gadung.

Iya madah ke Sarawak udah ngepunka transformasyen tumu enggau bejalaika pengawa bekenaka kuasa solar ba kandang menua pesisir nengah program Sarawak Alternative Rural Electrification Scheme (SARES) dikena nyilig injin api diesel.

Ku iya, pengawa nya nyata mantu peranak menua pesisir ngasai bekal kuasa karan ke meruan enggau murah agi.

Kelimpah ari nya, ku iya, Sarawak diatu meri perati ngagai pemansang ekonomi hidrogen nyadi pemansut kuasa dudi hari taja teknologi nya agi mar diatu.

Tang iya andal ke ungkus ngeluarka hidrogen deka murah agi dudi hari seriris enggau pengerembai teknologi global.

Datuk Patinggi Abang Zohari madah, Perintah Sarawak numbuhka pelajar bekaul singka miga ba palan pelajar tinggi lokal dikena nempa mayuh agi pengereja landik ba bidang teknologi tinggi.

“Dudi hari bepanggai ba data, ‘artificial intelligence’ (AI) enggau teknologi satelit. Nya kebuah kitai enda tau enda besikap ari diatu,” ku iya.

Ngenang silik, iya madah ke GPS deka majak ransing mai agenda “Sarawak First” enggau meri perati ngagai pemansang ekonomi, sebela ba pekara rama enggau pemeruan rampa menua.

Ku iya, Sarawak mega sedia ngena manah peluang ekonomi baru baka dagang karbon enggau teknologi nangkap karbon (CCUS) ke diperati bisi pengulih besai dudi hari.

Iya nyemetak madah, penyerakup rayat enggau penegap politik tetap nyadi kunchi pemujur Sarawak nyadi nengeri maju enggau besemekih di rantau ASEAN.

“Kitai dekaka Sarawak ukai semina nyadi bateri ASEAN ari sukut kuasa aja, tang mega bintang ASEAN dudi hari,” ku iya.

Sama datai, Presiden PDP Dato Sri Tiong King Sing, bala tuai parti komponen GPS sereta ke bukai. - EDISI UKAS