Sistem Pengerai Sarawak Meseti Ditegap Napi Rayat Mansang Tuai Manggai 2030
KOTA SAMARAHAN: Sistem pengerai enggau pemansang pengereja perubat nengeri meseti ditegap agi dikena napi pemar status rayat mansang tuai manggai 2030.
Sapit Premier Sarawak, Datuk Amar Profesor Dr Sim Kui Hian madah, ubah demografi nya disadang meri penanggul besai ngagai sistem nyaga pengerai, lebih agi ngaul penyakit enda berampit, nyaga komuniti enggau berubat timpuh panjai.
Iya nerang, Ripot Tinjau Pengerai enggau Morbiditi Nasional ke dibantai empai lama nunjukka semina urung 15 peratus ari penyampau tubuh orang tuai nya gerai.
“Reti nya, tebal agi rayat mansang tuai deka napi mayuh penanggul pengerai nyengkaum penyakit raya enggau penanggul pengerai runding,” terang iya.
Iya nyebut pekara nya lebuh dirandau media pengudah ngulu Konvensyen Antarabansa Nembiak Nyadi Indu Misi Ke-4 2026 (4th INSC 2026) di Universiti Malaysia Sarawak (UNIMAS), kena Hari Enam.
Ngenang silik, Menteri Pengerai Mensia Mayuh, Pengawa Berumah enggau Perintah Lokal Sarawak nya madah, bidang nyadi indu misi diatu ukai semina nyaga ba hospital aja, tang nyaga komuniti enggau berubat di rumah ke begunaka penemu pakar.
Nya ku iya, nyengkaum pengerembai teknologi baka ‘artificial intelligence’ (AI) ke deka beguna endar ba transformasyen sistem pengerai dudi hari. - EDISI UKAS
