KUCHING: Pengerami ngintu Hari Sarawak 2026 ke deka diatur di Sibu ari 20 nyentuk 22 Julai ila disadang matak lebih 5,000 datai meda pengerami nya.

Menteri Pengangkut Sarawak, Dato Sri Lee Kim Shin madah, pengerami taun tu deka diisi mayuh program ti inklusif ngayanka identiti nyelai Sarawak nyadi nengeri diuan pupu bansa enggau pengarap.

“Bala tuai raban bansa, tuai komuniti enggau rayat mayuh ari zon tengah diakul semua dikena ngemujurka isi program pengerami tu,” ku iya.

Iya nyebut pekara nya ba Aum Komiti Besai Ngintu Hari Sarawak Renggat Sarawak Ke 1/2026, ditu, Hari Empat.

Entara isi program dilanggur iya nya Karnival Bejual ari baruh penyeraris Sapit Menteri Pelajar, Inovasyen enggau Pemansang Penau Sarawak, Datuk Dr Annuar Rapa’ee.

Kelimpah ari nya, Pengerami Makai Selamat Pengarap Bukai deka diatur di Kingwood Hotel ari baruh tanggungpengawa Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Dr Penguang Manggil.

Program Zumba enggau Unity ke ditaga diatur di Dataran Tun Tuanku Haji Bujang deka diseraris Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Michael Tiang Ming Tee.

Berebak enggau nya, Pengerami Makai Selamat bela deka diatur di Masjid An-Nur, seraya sesyen Townhall diatur di Dewan Canselor Tun Abdul Taib Mahmud.

Kededua program nya deka diseraris Sapit Menteri ba Opis Premier Sarawak (Integriti enggau Ombudsman), Datuk Dr Juanda Jaya enggau Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol.

Batang pengerami iya nya Gempuru Hari Sarawak enggau Konsert Rayat deka diatur ari baruh penyeraris Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh. -EDISI UKAS