KUCHING: Pengeransing Perintah Sarawak ngenegapka pemansang infrastruktur enggau perengkaguna pemun ba menua ulu dikeingat komuniti Kelabit di Bario enggau Ulu Baram.
Pengawa nya dibantai nengah penemuai basa delegit 27 Tuai Komuniti enggau Tuai Raban Bansa (KMKK) ari Sub-Pelilih Bario ngagai Sapit Premier Sarawak ke nyadi Menteri Infrastruktur enggau Pemansang Penyangkai Kapal Sarawak, Datuk Amar Douglas Uggah Embas di opis iya di Begunan Kunsil Nengeri (DUN) Sarawak, Hari Empat.
Delegit nya betuai ke Sapit Menteri ba Opis Premier Sarawak (Pengereja Kasar, Imigresen enggau Patau Projek) ke mega Kaban Kunsil Nengeri (ADUN) Mulu, Datuk Gerawat Gala disempulang Pemancha komuniti Kelabit Bagi Menua Miri, Caleena Laleng Sakai enggau Presiden Rurum Kelabit Sarawak, Dato Isaac Lugun.
Lebuh berandau, Pemancha Caleena meri terima kasih ngagai Datuk Amar Douglas Uggah ti ransing gawa nyungkak pemansang menua pesisir lebih agi di Bario sereta menua Ulu Baram.
Ku iya, bemacham inisiatif dipejalaika perintah nengeri nyengkaum pemansang infrastruktur, rentayan jalai alun menua pesisir, ngadu ke utiliti enggau ngaga projek Unit Pekara Pengarap Bukai (UNIFOR) ke udah mai ubah besai ngagai tikas idup peranak menua nya.
Iya nerang, entara pemujur besai dibai baka nyendiaka bekal kuasa karan 24 jam, nambah bungkur telekomunikasyen enggau internet ba semua rumah panjai komuniti Kelabit di Bario enggau Ulu Limbang, nyengkaum projek bekal ai beresi ke diatu ngelantang ke tebal agi rumah panjai ba menua nya.
Delegit mega meri terima kasih ke pejalai nengah jalai darat penyauh 375 kilometer ti digulu Datuk Amar Douglas Uggah ari Miri ke Bario ba taun 2025 ngambi meda empu gaya jalai batang di Ulu Baram begulai enggau bala pegawai Opis Kereja Raya (JKR) Sarawak.
Pejalai nya dipeda beguna endar ti deka meri empas ba pemutus Perintah Sarawak ngambi sereta ngaga gazet jalai batang nya nyadi jalai nengeri.
Nya mega ngasuh pengawa ngintu enggau ngaduka jalai ulih digaga berurun sereta meruan agi dikena nambahka aksesibiliti, jalai penyambung, pengelikun enggau pengelantang rayat ba menua ulu.
Berebak enggau nya, delegit nya mega nerima manah pejalai projek ngaduka jematan enggau jalai menua pesisir di Ulu Baram, nyengkaum projek nampung arung STOLport Bario ke dikeandal ulih ngenegapka rentayan pengangkut sereta ngeranchak sosioekonomi di utara Sarawak tumbuh.-EDISI UKAS
