KCFC Nurai Sejarah Masuk Final Piala Malaysia, Semangat ‘Ngap Sayot’ Idup Baru
KUCHING: Pemujur tim Kuching City FC (KCFC) masuk renggat final Piala Malaysia 2025/2026 keterubah kenyau ari kelab ditumbuh taun 2015 dipeda nyadi sejarah besai nurai cherita baru main bol Sarawak.
Presiden KCFC, Dato Fazzrudin Abdul Rahman madah, pemujur nya ukai semina pemujur siti kelab aja, tang nyadi lambang main bol Sarawak angkat baru ba renggat nasional.
Iya nerang, pejalai KCFC nuju final ukai pemujur datai tekala nya, tang asil perambu timpuh panjai ti digaga berenggat kenyau ari berapa taun ke udah belabuh jeman jurulatih Irfan Bakti sebedau ditampung pengemudi ke diatu, Aidil Sharin Sahak.
“Lebuh kitai masuk ke renggat final, abis abis nembiak ba tetiap bagi menua, bala ti rindu ke pemain bol ke biak ulih meda kitai ulih nempa pemujur.
“Lalu bisi pelasar dikena kitai nyapai pemujur renggat tinggi agi ba main bol di Sarawak,” ku iya lebuh nyadi temuai program randau Juh Randau dikeluar Unit Komunikasi Awam Sarawak (UKAS) di Studio UKAS, ditu, Hari Empat.
Ku Dato Fazzrudin, pemujur nya ngayanka bala pemain biak Sarawak diatu bisi jalai enggau peransang nyingkang jauh agi ba main bol profesional.
Iya ke mega Tuai Sekretari Politik Premier Sarawak mega meri terima kasih ngagai Perintah Sarawak, raban pemelanja enggau pemadu beguna, pemain ke-12 tauka penyukung ti angkun majak meri sukung ngagai KCFC kenyau ari pun kelab ditumbuh.
Ku iya, sukung tegut bala penyukung ke seruran nedat stadium nyadi entara pengering tim nyentuk nurai sejarah masuk final pekit besai ti dikeingin tetiap tim bepekit ba Liga Malaysia.
Ba renggat final, iya sekali da meransang bala penyukung lebih agi peranak Sarawak ti diau di Lembah Klang sampal datai meri sukung ngagai tim.
Seraya Aidil minta bala pemain bemain enggau manah ba renggat final ngelaban Johor Darul Ta’zim (JDT) ungkup penyukung enggau rayat Sarawak.
“Aku enggai ngasuh semua pemain kusut runding laban peluang bemain final ukai datai belama.
“Aku deka ke sida ngasai baka ni bemain, laban sida sebilik, bala penyukung enggau pengatur seruran nyukung sida,” ku iya enggau ati ransing.
Aidil madah, tim nya meri perati ngagai pengawa besikap final ti berati ke pekara mentaliti pemain ngambi terus pechaya enggau berani bepadan ngelaban tim gerasi baka JDT.
Pekit final Piala Malaysia entara KCFC dan JDT ditaga diatur di Stadium Nasional Bukit Jalil kena 23 Mei tu.-EDISI UKAS
