LUBOK ANTU: Ujan bangat enda ngetu kenyau ari kemari ngujungka Jalai Nanga Kumpang ampuh nyentuk 0.51 meter lalu enda ulih ditengah semua bansa entukar.

Pegawai Penyaga Orang Periman Malaysia (APM) Pelilih Lubok Antu, Desem Samuel madah, asil ari pengawa matau pukul 9.20 pagi kemari tetemu ke jalai nya ampuh lalu arus ai dia deras.

Iya madah, pekara nya ulih ngeruga pengelikun penguna jalai alun sekali ke entukar mit tauka besai ti betengah ke jalai nya.

“Kelimpah ujan bangat enda ngetu, sistem parit ti alit ba endur nya bela dikenuku siti ari kebuah ngasuh endur nya ampuh,” ku iya.

Berebak enggau nya, iya ngelalau peranak dia ngena Jalai Sayat enti deka nurun ke Engkilili tauka Lubok Antu nyentuk ai dia surut.

Iya nyemetak madah, raban APM Lubok Antu deka terus bejalaika pengawa matau sebarang maya dikena nentuka pengelikun penguna jalai alun semampai tejamin.

Mensia mayuh dilalau seruran berati ke penerang enggau lalau pemadu baru ari raban bekuasa sereta enda nujah endur ti ampuh.

Iya mega ngelalau mensia mayuh betelefon ngagai lumur 999 tauka Bilik Nyaga Operasyen Pelilih (PKOD) APM Lubok Antu ba lumur 083-584639 enti bisi sebarang penusah ngenyit tauka minta bantu. – EDISI UKAS