Menteri Utiliti enggau Telekomunikasyen Sarawak, Dato Sri Julaihi Narawi madah, bayar zakat dagang nya keterubah diberi Sarawak Water ngagai Baitulmal Sarawak.
Ku iya, bayar nya ngayanka kompeni ransing bejalaika tanggungpengawa korporat ti meruan enggau inklusif kelimpah bekunsi jereki enggau raban ti begunaka bantu.
“Tu keterubah Sarawak Water meri zakat ngagai Baitulmal Sarawak ke dikemata Premier Sarawak tadi.
“Pengawa nyua zakat dagang tu ukai semina bejalaika pengawa kompeni aja, tang ngayanka penyiru Sarawak Water gawa baru ke rayat sereta nyaup pemansang sosioekonomi nengeri Sarawak,” ku iya.
Iya nyebut jaku nya lebuh dirandau pemberita pengudah pengawa nyua zakat nya ti udah dikemata Premier Sarawak, Datuk Patinggi Tan Sri (Dr.) Abang Abdul Rahman Zohari Tun Datuk Abang Openg ba Kunsil Nengeri (DUN) Sarawak, Hari Lima.
Iya madah, Sarawak Water deka majak ngentapka pangku pengawa sida nyadi organisasyen ti bisi tanggungpengawa, integriti enggau seruran ngemerat ke pengelantang rayat setipak enggau juluk Perintah Sarawak.
Zakat dagang nya disua mega ngayanka pengeransing kompeni ke ukai semina nentuka servis bekal ai bisi kualiti ngagai rayat aja, tang regas gawa nyukung agenda pemansang rama enggau pengelantang rayat.
Sama datai, Sekretari Perintah Sarawak ke mega Chairman Kaban Kaunsil Direktor Sarawak Water, Datuk Amar Mohamad Abu Bakar Marzuki sereta Pemangku Tuai Pegawai Eksekutif Sarawak Water, Maselni Jamal.-EDISI UKAS
