KUCHING: Sarawak nurai siti da sejarah lebuh Ombudsman Sarawak diatu udah berengkah bejalaika pengawa meresa enggau nyemela administrasyen agensi perintah nengeri sereta gempung bekaul perintah di nengeri tu.

Sapit Menteri ba Opis Premier Sarawak (Integriti enggau Ombudsman), Datuk Dr Juanda Jaya madah, raban nya ngayanka Perintah Sarawak keran ngenegapka integriti, akauntabiliti enggau atur gawa ke manah.

Ku iya, tuju penemuai basa begulai enggau lima kaban Ombudsman Sarawak ngagai Premier Sarawak diatur dikena madah ke gempung nya diatu udah tetangkupka atur minimum nyadi kaban baka ditetap ari baruh Ordinan Ombudsman Sarawak.

“Tu sejarah besai ngagai Sarawak laban semina kandang menua kitai aja di Malaysia ti ngembuan Ombudsman kediri.

“Ari bejalaika pengawa tu, Ombudsman Sarawak deka ngesan pangku pengawa meresa enggau matau pengawa ngatur sereta administraysen agensi perintah nengeri, raban bekuasa lokal (PBT), gempung bekanun nengeri, kompeni bekaul perintah (GLC) sereta sebarang agensi ti nerima emolumen ari perintah nengeri,” terang iya.

Iya nerang pekara nya lebuh dirandau media pengudah ngatur penemuai basa ngagai Premier Sarawak, Datuk Patinggi Tan Sri (Dr.) Abang Abdul Rahman Zohari Tun Datuk Abang Openg di Opis Premier Sarawak ba Kunsil Nengeri (DUN) Sarawak ditu, Hari Lima.

Iya madah baru, DUN Sarawak empai lama mega ngemendarka pengawa numbuh ke Komiti Pilih Khas dikena nyerenih ripot ninting taun Ombudsman Sarawak ke deka dibantai ba sesyen DUN deka datai.

Ku iya, komiti nya deka nentuka tetiap perambu enggau lalau ke dikenatai Ombudsman diadu manah raban bekaul.

Berebak enggau nya, iya madah ke 67 ripot udah diterima pengudah ditisih Ombudsman Sarawak.

Iya nerang, bisi ripot ti ngembuan dawa tang nadai penerang nyengala, kelimpah bisi ngaul penyalah enggau makai suap ke terus diberi ngagai Polis Diraja Malaysia (PDRM) sereta Komiti Besai Nagang Penyalah Makai Suap Malaysia (SPRM).

“Kitai nyelinting isu salah pengawa tauka mal-administration ngaul agensi perintah nengeri, PBT, gempung bekanun enggau GLC Sarawak.

“Enti sema rayat bisi tetemu ke pengawa salah, datai lalu padah ngagai raban Ombudsman disempulang penerang nyengala sereta data ke bekaul,” ku iya.

Iya mega madah, identiti orang ti bedawa deka disalam lalu mensia mayuh tau ngaga ripot nengah surat, email tauka website rasmi Ombudsman Sarawak.

Iya mega madah, aplikasyen dawa benung digaga enggau kerejasama SAINS ngambi rayat nyamai ngaga ripot dudi hari.

“Batang tuju numbuh ke Ombudsman dikena nentuka Sarawak jampat nyingkang ke mua ari sukut integriti, akauntabiliti enggau kedaulatan undang-undang.

“Kitai deka ke pemeranak puku antarabansa andal ke sistem administrasyen di Sarawak laban pengandal ba integriti enggau atur gawa beguna endar dikena matak pengawa meranak puku,” ku iya nyemetak.-EDISI UKAS