Menteri Kereja Raya ke mega Kaban Parlimen Kapit, Dato Sri Alexander Nanta Linggi madah, pekit baka nya beguna endar nentuka identiti budaya raban bansa Dayak dijaga belama lalu enda lenyau disegang pemansang jeman.
“Kelimpah ari nya, pekit baka tu mega ulih mantu industri mit ngaga ngepan asal laban diatu majak mayuh rebak biak temegah ngerasuk ngepan asal nya.
“Pekit tu beguna endar dikena ngetan adat enggau budaya kitai ngambi enda lenyau disegang pemansang jeman,” ku iya ba Pengerami Makai Lemai Mantar Gawai Dayak Renggat Pelilih Song 2026 di Balai Raya Song kena Hari Enam.
Ba pengerami nya, Joyce Elysa Jantom dipadu nyadi Kumang Gawai Dayak Pelilih Song 2026 lalu nerima perais mata duit RM5,000 disempulang trofi, jumpang enggau selampai Kumang.
Lumur dua ke mai gelar Lulung diempu Carrantnqtivya Servy Steward ke nerima perais RM4,000 sereta trofi enggau selampai.
Seraya lumur tiga ke mai gelar Selingar Matahari diempu Marycia Selamat enggau perais RM3,000 sereta trofi enggau selampai. -EDISI UKAS
