TATAU: Agensi Pemansang Kandang Menua Tengah Rajang tauka Mid Rajang Regional Development Agency (MiRRDA) majak ngenegapka agenda pemansang menua pesisir nengah agih belanja sepenyampau RM1.5 bilion dikena bejalaika mayuh projek infrastruktur enggau pemansang ekonomi ba menua tengah Sarawak.

Kaban Parlimen Selangau, Edwin Banta madah, pemansang dipejalai ari baruh MiRRDA ngaul sitak Parlimen Selangau enggau Parlimen Kanowit mungkur sitak Kunsil Nengeri (DUN) Kakus, Tamin, Ngemah enggau Machan.

Ku iya, entara diperati iya nya projek ngaduka rentayan jalai lebih agi ba menua Kakus enggau Tamin dikena nambahka perengkaguna penyambung sereta akses peranak menua pesisir.

“Pemansang infrastruktur ke manah agi beguna endar nentuka rayat menua pesisir ulih ngasai perengkaguna penyambung ke lantang enggau ngerandang mayuh agi peluang ekonomi ngagai peranak,” ku iya.

Iya nibar ke jaku nya ba Pengerami Mangkong Tiang di Rumah Gani, Sungai Batu, Anap kena Hari Enam.

Kelimpah pemansang infrastruktur, ku iya, MiRRDA mega meri perati ngagai sektor betanam betupi nengah bantu nanam sawit enggau kup dikena ngenegapka ekonomi rayat sereta nambahka penatai pemisi pekebun mit ba menua pesisir.

Berebak enggau nya, iya mega meransang bala tuai rumah enggau Komiti Pemansang enggau Pengelikun Genturung Pendiau (JKKK) seruran regas ngulu program diatur perintah nentuka peranak menua pesisir enda tinggal ari nerima penerang enggau buah pemansang diberi perintah.

Ba pengerami nya, Edwin mega ngemendarka agih belanja RM24,000 ngagai JKKK Rumah Gani sereta tambah RM5,000 ngagai Biro Indu Rumah Gani dikena nyukung pemansang komuniti enggau ngatur aktiviti dia.-EDISI UKAS