MIRI: Pengerami Gawai Dayak Bagi Menua Miri 2026 nyadi panggau besai ngerapitka kaul penyerakup rayat pupu bansa enggau budaya sereta nyukung agenda pemansang Sarawak manggai 2030.
Menteri Pelajar, Inovasyen enggau Pemansang Penau, Dato Sri Roland Sagah Wee Inn madah, sulu jaku pengerami sekali tu “Indi Awang, Indi Aseng, Ngancang Pimaancang” ke mai reti “One Mind, One Heart, Towards Development” endang engkeman endar enggau enggau ngerapitka kaul penyerakup rayat nyadi penyungkak pemansang nengeri, seriris enggau juluk Strategi Pemansang Pengudah COVID-19 (PCDS) 2030).
Ku iya, pemujur pemansang ukai semina bepanggai ba polisi perintah aja, tang mega begunaka pengeransing enggau kerejasama rat entara pupu bansa, budaya enggau pengarap ke nyadi pengering nyelai Sarawak.
Iya mega madah ke pemesai guna pemansang modal mensia nengah pelajar bekualiti, inovasyen enggau pemansang penau lebih agi bidang strategik baka Sains, Teknologi, Injiniring enggau Matematik (STEM), Artificial Intelligence (AI), ekonomi digital, teknologi gadung, singka miga sereta kuasa ulih dikena baru.
“Perintah Sarawak deka majak ngenegapka pelajar teknikal enggau latih vokasional (TVET) dikena nentuka nembiak disikap pengelandik relevan sereta ngerembaika akses pelajar nyengkaum ba kandang menua pesisir,” ku iya.
Iya nyebut jaku nya ba mua mayuh rambau pengawa bejadi pengerami makai lemai nya ke diatur di Hotel Meritz kena Hari Enam.
Seraya Chairman Pengatur, Simon Ilus madah ke pengerami Gawai Dayak ukai semina pengerami tembu ngetu aja, tang lambang identiti enggau pesaka budaya ke ngayanka pemanah baka semangat bekerejasama, bebasa enggau beterima kasih.
Iya madah, pengerami taun tu diatur enggau kerejasama 12 serakup etnik Dayak enggau Orang Ulu begulai enggau Opis Residen enggau Pelilih Miri, lalu mandangka pengering penyerakup rayat pupu bansa di bagi menua nya.
Pengerami mega richah enggau pemerindang main asal raban bansa Bidayuh, Orang Ulu enggau Iban kelimpah pekit kepenudi Keling-Belawan, Kumang Iban, Keligit Orang Ulu enggau Dayung Sangon.
Ba pekit nya, Malvist Buyong dipadu nyadi champion Keling-Belawan, Vanessa Serawa Suel menang kategori Kumang Iban, Rennie Bulan Johnny menggi gelar Keligit Orang Ulu seraya Melanie Joyce Jeman ngempu gelar Dayung Sangon.
Pekit nya mega meda kelai nyerah pengawa nyadi tuai rumah Pengerami Gawai Dayak Bagi Menua Miri 2027 ngagai Geremp Serakup Orang Ulu Sarawak Malaysia (FORUM).-EDISI UKAS
