SELANGAU: Pengawa bejadi Lepapa Supermarket Selangau enggau Roxy Hotel Selangau ngayanka Selangau nyata deras mansang nyadi palan ekonomi baru tumbuh ba kandang menua pesisir Sarawak.

Kaban Kunsil Nengeri (ADUN) Tamin, Christopher Gira Sambang madah, pengawa meranak puku dipejalaika kompeni lokal nya ngayanka pengandal pemeranak puku ke pengulih besai dikembuan menua nya.

“Suba orang meda Selangau tu menua endur ngetu aja, tang diatu kitai dekaka dunya meda Selangau nyadi menua mansang dudi hari enggau palan ekonomi menua pesisir tumbuh ke moden sereta progresif,” ku iya.

Iya nibar ke jaku nya lebuh bejadika pengawa Bejadi Lepapa Supermarket Selangau enggau Roxy Hotel Selangau, kena Hari Enam.

Ku Christopher, kededua premis nya ditumbuh dikeandal mai mayuh pemaik ngagai komuniti dia nyengkaum pengawa puang, ngeranchak aktiviti ekonomi, mantu orang dagang mit enggau pemekal lokal sereta nambah perengkaguna ngagai peranak enggau pengusung.

Ku iya, Roxy Hotel Selangau mega ulih nyadi penyungkak sektor dagang temuai enggau dagang ba menua nya ari nyendiaka endur diau bemalam ke lantang enggau bisi kualiti.

Berebak enggau nya, iya mega madah ke sekeda projek pemansang besai benung enggau deka digaga ba menua Selangau.

Entara projek nya nyengkaum ngaga Selangau Mini Sports Complex beungkus RM11.5 juta, ngaga kuarters orang gawa Perintah Sarawak beungkus RM48 juta, nyeruri Klinik Pengerai Tepus beungkus RM7 juta sereta Klinik Sekuau beungkus RM3 juta.

Kelimpah ari nya, ngaga Opis Pelajar Pelilih Selangau beungkus RM3 juta enggau Sekula Sekondari (SMK) Selangau beungkus RM81 juta mega entara projek beguna dikena ngenegapka pemansang pelajar ba menua nya.

Christopher mega madah, projek Jalai Ulu Mukah beungkus RM65 juta enggau Jalai Ulu Oya beungkus RM200 juta ke diatu benung ditinda lalu disadang berengkah gawa ujung taun tu.

“Ngena agih belanja Mid Rajang Regional Development Agency (MiRRDA), perintah mega ngemendarka sekeda projek ngaga jalai strategik nyengkaum ngaga jalai ari Rumah Sebeli ke Rumah Emong Ulu Mukah beungkus RM175 juta dikena nambahka akses menua pesisir sereta nyamai ngangkut asil kebun,” ku iya. -EDISI UKAS