KUCHING: Perambu ngaga Balai Polis Lachau dipegai Indu Opis Polis Pelilih Sri Aman udah dikemendar enggau ungkus sepenyampau RM40.7 juta.

Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, projek nya dikemendar ari baruh Projek Entara Menua (Sabah enggau Sarawak) Opis Menteri Dalam Menua nengah Rolling Plan Kelima, Langgur Pemansang Malaysia Lumpar Ke-12 (RMK-12).

“Balai Polis Lachau deka didiri di Lot 1252, Blok 12, Pelilih Tanah Selanjan enggau 3.2 hektar pemesai dikuasa Pesuruhjaya Tanah Perintah Besai enggau diungkup endur ngentak begunan opis sereta kuarters rumah,” ku iya.

Iya nyebut pekara nya lebuh nyaut tanya Kaban Kunsil Nengeri (ADUN) Bukit Begunan, Datuk Mong Dagang ba Aum Kunsil Nengeri (DUN) Sarawak Ke-19 kena Hari Lima.

Ku iya, Opis Kereja Raya Sarawak udah dipadu nyadi agensi bejalaika projek nya.

Iya mega nerang, skop projek ngaul pengawa ngaga begunan opis, 14 unit kuarters Kelas F, dua unit kuarters Kelas E, tiang pemanchar kuasa karan, blok kuasa karan enggau tangki tai.

Kelimpah ari nya, projek nya mega mungkur pengawa ngaga surau, tangki ai enggau rumah pam, pegung ai, entepan entukar, langkau jaga sereta bunker sapat. -EDISI UKAS

Pemberita: Ahmad Daniel Faiz
Gambar: Hazrin Sunaini