SIBURAN: Bantu Barang Diguna Pemun Sarawak (SKAS) ditambah dikena mantu rayat nengeri tu ngelempungka tating belanja idup ke majak niki maya diatu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, batang tuju meri bantu nya ngambi rayat ulih meli barang diguna pemun nyengkaum barang dapur.
“Kitai ngarap ke ari bantu ditambah tu, kitai ulih ngelempungka mimit tating belanja idup rayat kitai enggau penyampau urung 800,000 penerima di selampur Sarawak,” ku iya.
Iya nibar ke jaku nya lebuh dirandau pemberita pengudah sesyen walkabout SKAS 2026, ditu, Hari Lima.
Sesyen walkabout nya serimbai pengawa ngagih renggat kedua SKAS 2026, ke alai ku Datuk Patinggi Abang Zohari kategori ruang bilik nerima sepenyampau RM424 seraya kategori orang tuai enggau bujang bela nerima RM234 enggau RM150.
Ngenang silik, Premier Sarawak nyemetak madah ke perintah mega nyendiaka ba tu bukai nyengkaum meri diskaun khas sepenyampau 25 peratus ngagai bil api ngagai penguna domestik, seraya diskaun suwa premis sepenyampau 50 peratus.
“Pengawa meri diskaun tu deka dipelanja perintah ke alai perintah deka mayar ungkus nya, nyengkaum karan,” terang iya.
Sama datai, Sapit Premier Sarawak Datuk Amar Profesor Dr Sim Kui Hian, Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn, Sekretari Perintah Sarawak Datuk Amar Mohamad Abu Bakar Marzuki, Sapit Menteri Pengangkut Sarawak Datuk Dr Jerip Susil, Sapit Menteri Industri Pemakai, Komoditi enggau Pemansang Kandang Menua Sarawak Datuk Martin Ben enggau Kaban Parlimen Puncak Borneo Datuk Willie Mongin. -EDISI UKAS
