SACOFA Tiang Sukung Sarawak Nambah Rentayan Internet Nengeri
SIBURAN: SACOFA deka nyadi tiang sukung besai infrastruktur telekomunikasyen nengeri dikena nambah bungkur enggau peneras internet lebih agi ba menua pesisir.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, perintah enda ulih kelalu bepanggai ba kompeni operator telekomunikasyen komersial dikena ngerembaika rentayan internet ba menua ke mit makit tang begunaka ungkus infrastruktur tinggi.
“Kitai enda ulih kelalu bepanggai ba kompeni komersial kandang diatu, perintah deka ngena SACOFA nyadi tiang sukung rentayan laban kompeni tu tebal agi diempu perintah.
“Ungkus ngintu infrastruktur mega deka dipelanja perintah nenhah SACOFA lalu dikearap ari chara tu ulih nambah peneras sereta kualiti bungkur internet,” ku iya.
Iya nyebut jaku nya lebuh dirandau pemberita pengudah sesyen walkabout Bantu Barang Diguna Pemun Sarawak (SKAS) 2026, ditu, Hari Lima.
Ngenang pekara bekaul, Datuk Patinggi Abang Zohari mega madah ke visyen timpuh panjai Sarawak nyerungkai teknologi internet bepelasarka satelit ke badu agi bepanggai ba gentian optik, tang deka ngalih ngagai sistem komputer remang enggau nyimpan data digital.
“Nya kebuah kitai begunaka satelit kediri, nyengkaum nanosatelit ke diengkah di orbit.
“Diatu, bisi teknologi baru ngasuh sambung internet di menua ulih disambung nengah ‘low earth orbit’ ngena chip baru,” terang iya.
Ku iya, taja teknologi nya agi ba renggat pemansang enggau tungkap, iya andal ulih ngamatka juluk ekosistem digital bepelasarka satelit manggai 2030. -EDISI UKAS
