Selangau Begunaka Mayuh Pengereja Landik Ba Bidang STEM
SELANGAU: Selangau begunaka mayuh agi pengereja landik ba bidang Sains, Teknologi, Injiniring enggau Matematik (STEM) laban sektor nya bisi pengawa puang mayuh agi enggau ulih besemekih dudi hari.
Kaban Parlimen Selangau, Edwin Banta nyemetak madah, pengawa puang ke mayuh enggau ulih besemekih mega deka nyungkak tikas ekonomi sereta kualiti idup rebak biak ba menua pesisir.
“Belalauka data penerima bantu pelajar, kitai berati ke agi kurang endar nembiak milih bidang STEM lebih agi injiniring taja bidang nya mayuh pengawa puang enggau besai gaji,” ku iya.
Iya nyebut jaku nya lebuh bejadi Pengawa Nangguh Mini Karnival Bejual enggau Agensi Begulai Enggau Komuniti Ulu Arip, ditu, Hari Lima.
Kelimpah pelajar pechuma, iya madah ke nembiak ari menua Selangau ke nampung pelajar ngagai palan pelajar tinggi (IPT) bela nerima bantu pelajar ‘one-off’ dikena ngelempung belanja sida.
“Ba taun 2026 aja, sepenyampau RM70,800 udah diberi ngagai 84 penerima, lalu kenyau ari dipejalai ba taun 2023, sepenyampau 569 nembiak udah nerima pemaik enggau semua penyampau manggai RM561,000,” ku iya.
Berebak enggau nya, iya ngansak apai indai meri perati ngagai pelajar bala anak dikena nyamin pengidup menyana enggau ngangkatka tikas idup sida sebilik dudi hari.
Ngenang pekara bukai, iya madah ke Perintah Sarawak udah ngemendarka RM4.8 juta dikena mantu pekebun di Parlimen Selangau lebih agi ba pengawa nanam kupi.
Ba pengawa ke sama, iya mega bisi nyua chek bantu pelajar ngagai 32 nembiak IPT kelimpah nyua lima chek bantu ngagai serakup enggau Komiti Pemansang enggau Pengelikun Genturung Pendiau (JKKK) rumah panjai.-EDISI UKAS
