SINGAPURA: Sarawak ngenegapka pengawa ba agenda pemeruan global nengah pejalai gawa pengelama dua hari Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ke Singapura ke berengkah ari sehari tu.

Batang pejalai Premier sekali tu ngulu Philanthropy Asia Summit 2026 ke alai iya entara bala tuai ke deka bekunsi penemu ba sesyen ‘The Public Agenda’ ba konvensyen besai nya di Sands Expo and Convention Centre, Marina Bay Sands, Singapura kena 18 Mei.

Ba penemu dikunsi ila, Datuk Patinggi Abang Zohari deka bekunsi peneleba Sarawak empu nyungkak pemansang ekonomi sereta ngurangka intensiti karbon sereta baka ni penyeraris polisi, kerejasama kuasa beresi ngilah entara menua enggau puku timpuh panjai ulih digempung begulai dikena ngerumban pengelantang.

Iya mega deka ngenang pasal startegi Sarawak nyeraris polisi, undang-undang enggau institusyen ari baruh siti visyen timpuh panjai ke inklusif – ari Strategi Pemansang Pengudah COVID-19 (PCDS) 2030 ngagai Pelin Atur Pemeruan Sarawak, Polisi Idar Kuasa Sarawak, enggau Pelin Tuju Kuing Ekonomi Hidrogen Sarawak.

Diatur Philanthropy Asia Alliance, konvensyen diatur ari 18-20 Mei nya meri perati ngagai inovasyen Asia ke bisi pengulih dibai ngagai renggat global, sereta kerejasama entara sektor.

Nya ngempuruka bala tuai ari sektor filantropi, dagang enggau perintah ke begulai nyerungkai baka ni sains, teknologi, melanja inovatif sereta kerejasama ngilah sektor ulih nyungkak pemutar ke berani ba bidang klimet, pengerai enggau pemansang inklusif.

Dulu ari nya, sebedau bekunsi penemu, Premier ditaga ngatur randau enggau Menteri Pengereja Pengawa Singapura, Tan See Leng dikena ngenegapka kerejasama strategik entara kededua menua.

Kelimpah ari nya, iya mega ditaga ngatur aum beprofil tinggi begulai enggau raban Temasek Trust enggau Equatic ke disadang nyelinting randau bekaul sektor kuasa enggau mayuh pekara bukai.

Datai ngelalu penatai Premier di hotel endur diau iya nya Sapit Sekretari Perintah Sarawak (Perambu Ekonomi & Pemansang) Dato Sri Dr Muhammad Abdullah Zaidel, Pemangku Tuai Pegawai Eksekutif Sarawak Water Sdn Bhd Malseni Jamal enggau Pemangku Sekretari Mendam Opis Menteri Kuasa enggau Pemeruan Rampa Menua Sarawak, Ts. Dr. Nurleyna Yunus. - EDISI UKAS