Kerejasama Sarawak-Singapura Ngaga Koridor Energi Gadung Ngilah Menua
SINGAPURA: Kerejasama strategik Perintah Sarawak enggau Singapura ba pemansang koridor energi gadung ngilah menua deka ngenegapka agi penuduk nengeri tu nyadi hub energi gadung serantau.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ari kaul serantau ke tegap, Sarawak diatu nyingkang ke mua besaup nempa pemujur Asia Tenggara.
Ku iya, Sarawak kenyau ari suba bisi juluk ati ke besai deka nyadi 'Bateri Asean' nengah pengawa ngena pun penatai pengeraja asal ke ulih dikena baru.
"Sehari tu, juluk ati nya deka dipenyadika kita. Ba sebengkah ari pengawa tumu ngaga Grid Energi ASEAN, kami benung ngaga koridor energi gadung dua buah menua.
"Kaul serantau tu deka ngaga grid karan ngilah entara menua," ku iya madah.
Iya madah ke pekara nya maya ngenataika jaku ‘Sarawak and the Region: A Green Economy Being Built in Real Time’ semasa Philanthrophy Asia Summit 2026 di Sands Expo and Convention Centre, Marina Bay Sands ditu, Hari Satu.
Iya mega madah, kerejasama nya ukai semina bekaul energi aja tang bela nempa infrastruktur begulai ti mai pemaik timpuh panjai.
"Langkar kereja komersial, seni ngaga enggau pugu teknikal semua iya benung digaga. Tu nempa kaul energi ke digaga antara dua ekonomi.
"Aku meda tu ukai semina transaksyen, tang siti infrastruktur begulai. Nama ke benung digaga kitai, rentayan grid tu deka mai pemaik enggau penguntung," pia ku iya madah baru.
Dulu ari nya, Datuk Patinggi Abang Zohari ngirup pagi begulai enggau Menteri Orang Gawa Singapura, Dr Tan See Leng.
Awak nya dikena seduai besilih penemu bekaul macham pekara ti ngenegapka agi kerejasama dua buah menua.
Nangkan nya, Premier Sarawak ngulu aum begulai enggau Temasek enggau Equatic Inc.
Delegit Temasek betuaika Tuai Pegawai Eksekutif Dilhan Pillay Sandrasegara lalu delegit Equatic Inc diaraika Penengkebang ke mega Tuai Pegawai Teknologi, Gaurav Sant.
Udah dia, Premier Sarawak merarau begulai Tuai Pegawai Eksekutif Temasek Trust, Desmond Kuek sereta pemesai ke bukai kompeni nya. -EDISI UKAS
