Sarawak Ngemuntang Pengawa Meli Rumah, 1,052 Buah Digaga Nengah RMK-13
KUCHING: Perintah Sarawak ngemuntangka agi pengawa meli rumah alai 1,052 buah agi deka digaga di selampur nengeri nengah 12 bengkah projek ba Langgur Pemansang Malaysia Lumpar Ke-13 (RMK-13) berengkah taun siti agi.
Sapit Premier Sarawak Dato Amar Dr Sim Kui Hian madah, projek nya deka digaga di Kuching, Betong, Sibu, Mukah, Bintulu, Miri, Limbang enggau Lawas.
Iya madah, inisiatif nya kelai pengeransing Perintah Sarawak nangkan pemujur ngaga 12 iti projek ba RMK-12 ke bisi 679 buah rumah ulih dibeli enggau semua ungkus nyauka RM148 juta.
"Kitai deka meda semua rayat bisi rumah ke digaga enggau chara inklusif sereta betandu nyengkaum bela bisi nyaup mayar kelimpah meri hak beempu strata," ku iya madah.
Iya nerang ke pekara nya maya nyimpul jaku ari opis menteri iya ba Aum Kunsil Nengeri (DUN) Sarawak Ke-19, Hari Dua.
Iya ke mega Menteri Pengerai Mensia Mayuh, Pengawa Berumah enggau Perintah Menua madah, perintah nengeri bela bisi nyendiaka bantu nengah Geran Mutiara Mortgage and Credit.
Ke penemu mayuh, pengawa ngaga Projek Rayat nengah Rumah SPEKTRA Permata (RSP) udah nyaup rayat lebih agi menua pesisir bisi rumah diri empu.
Naka ke diatu, empat iti projek RSP mujur tembu ke mungkur 154 buah rumah digaga di Santubong, Ulu Kabong, Tian enggau Igan ngena belanja RM69.2 juta.
Ba taun 2026, 276 buah RSP benung digaga di Gedong, Sambir, Limbang, Banting enggau Lawas ti ngena belanja RM36 juta. -EDISI UKAS
