KUCHING: Perintah Sarawak udah nambah penyampau Bantu Barang Diguna Sarawak (SKAS) ngagai RM680 juta taun tu dikena nyaup rayat napi tating belanja pengidup maya hari tu.
Sapit Premier Sarawak Datuk Amar Douglas Uggah Embas madah, pemutus nya mandangka perintah semampai ransing nyaup nentu pengelantang rayat.
Ku iya, bantu SKAS nya mungkur pemutus nambah RM950 ngagai RM1,100 ungkup tiap ruang bilik, RM500 ditambah nyadi RM600 ungkup orang tuai enggau RM300 nyadi RM375 ungkup orang bujang.
Iya madah, bantu nya meri pemaik ngagai nyauka 900,000 penerima di selampur Sarawak.
"Bantu tu diberi tiga renggat iya nya Mac, Mei enggau November 2026 nengah S Pay Global ti mungkur semua penyampau manggai RM680 juta, nambah RM198.42 juta enti dibanding taun siti tadi," pia ku iya.
Iya nerang ke pekara nya maya meri jaku simpul ari opis menteri iya ba Aum Kunsil Nengeri (DUN) Sarawak Ke-19, Hari Tiga.
Kelimpah SKAS ku iya, perintah mega meri diskaun karan 25 peratus ungkup penguna domestik ari April nyentuk Disember 2026 ti deka meri pemaik ngagai lebih 700,000 penguna di selampur Sarawak lalu begunaka belanja manggai RM188.1 juta.
Kelimpah ari nya, iya madah, perintah nengeri mega meri diskaun suwa 50 peratus ungkup orang dagang ba premis dagang ke dipegai Opis Bekuasa Menua (PBT) enggau badan berkanun.
Datuk Amar Douglas Uggah madah, Perintah Sarawak bela nyaup meri 50 peratus royalti kampung, premium enggau tarif kayu kilang enggau eksport ari kampung ungkup semua lisin nebang kayu kampung, enda nyengkaum Tarif Indusri Kayu Sarawak.
"Tu berengkah ari 20 April 2026 nyentuk 19 April 2027 dikena nyaup ngurang tating belanja industri bekaul," ku iya ti mega Menteri Pekara Wang enggau Ekonomi Baru II. -EDISI UKAS
