SARIKEI: Program nemuai ngagai beberapa buah rumah panjai di Ulu Sarikei Bayong ukai semina meri awak berandau semak agi enggau rayat tang nyadi pelasar ke engkeman dikena ngabas pemansang menua pesisir.

Sapit Menteri Ladang enggau Komoditi Dato Sri Huang Tiong Sii ngena chara nya nemuai ngagai enam buah panjai iya nya Rumah Empaling Lanyau, Rumah Mawas Timbu, Rumah Gandom Balong, Rumah Padang Kasa, Rumah Tayan Gundi enggau Rumah Perada Achop, Hari Empat tu tadi.

Iya ke mega Kaban Parlimen Sarikei bela ngena awak nya ngenataika jaku selamat Hari Gawai ngagai rayat di menua nya lalu ngarapka Gawai taun tu mengkang nyadi pelasar ngenegap pemanah kaul enggau pangan diri.

Iya bela beterima kasih ke lebih 10 taun sukung rayat dia ngagai iya ke nyadi pengari rayat di menua nya.

Ku iya, macham projek pemansang digaga maya tu bepun ari pemanah kaul perintah enggau rayat.

"Aku semampai ransing mai pemansang ngagai menua pesisir baikka nya jalai alun, parit, jalai kebun tauka ngadu jalai ngelawa rumah panjai," ku iya ti mega Kaban Kunsil Nengeri (ADUN) Repok.

Ba penemuai nya, Dato Sri Huang bisi nyuaka Projek Pintu ngagai peranak rumah panjai. -EDISI UKAS