Sapit Menteri Infrastruktur enggau Pemansang Penyangkai Kapal Sarawak Datuk Majang Renggi madah, pengerami ke diatur berengkah 1 Mei nya ukai semina richah enggau penatai bansa Dayak aja tang bela dirami Melayu, China enggau rayat menua sepiak.
"Tu senutuk enggau rambai jaku Gawai Dayak taun tu Segulai Sejalai ti deka ngenegapka agi pemanah kaul rayat pupu bansa di Sarawak," ku iya madah.
Iya bejaku munyi nya maya Pekit Kumang Sarawak serimbai Gawai Bazaar enggau Ethnocultural Festival ditu, Hari Empat.
Iya mega madah, pengerami ke diatur 21 hari nya ngelai rayat Sarawak rindu begulai enggau pangan diri taja enda sama bansa enggau jalai pengarap.
Kelimpah ari nya, Datuk Majang madah, pengerami mandangka main asal baka nya beguna dikena besaup nyaga pesaka asal bansa Dayak.
Ba pekit nya, gela Kumang Sarawak 2026 diempu Vaneesa Serawa Suel lalu ditangkan Shaline Agnes Ali ba penuduk lumur dua enggau Patrisia Sylvia Sibat ngempu penuduk lumur tiga. -EDISI UKAS
