SARIKEI: Projek jalai ‘Missing Link’ 5.6 kilometer pemanjai Nanga Bangkit, Nanga Lebaan ke Jalai Sibu - Tanjung Manis disadang deka meransang penumbuh ekonomi menua nya.

Kaban Kunsil Nengeri (ADUN) Daro, Dr Safiee Ahmad madah, taja jalai nya enda panjai, tang mai empas ke besai ketegal nambah jalai ke udah bisi.

Ku iya, penembu jalai nya ila deka ngemuntangka agi pejalai ngelawa jalai nebing tasik enggau jalai besai.

"Kitai andal penembu jalai tu deka ngepunka baru pemansang menua sepemanjai jalai nya, lebih agi ba tanah ke tusah dikemansang sebedau tu laban nadai jalai," pia ku iya.

Iya bejaku munyi nya ngagai media sepengudah ngulu Pengawa Nyua Chek Pampas Tanah Projek Proposed ‘Missing Link’ ditu, Hari Lima.

Kelimpah ari nya, Dr Safiee mega madah, projek nya disadang ulih tembu enda lebih ari 30 bulan.

"Naka ke diatu nadai isu bukai nyadi lalu projek digaga enggau mujur," ku iya madah baru.

Bekaul pengawa nya, iya madah, bisi 18 iti chek beungkus RM146,986.56 disua ngagai 16 penerima ke bisi tanah ditujah projek nya.

Ku iya, pengawa nyua pampas nya ngelai perintah semampai nyaga hak rayat ke beempu tanah kelimpah deka meda projek pemansang digaga enggau mujur sereta nadai penanggul.

Iya madah, kerejasama manah ari rayat menua bela nyaup nentu projek digaga enggau lengkas agi.-EDISI UKAS