KUCHING: Sarawak sekali agi nurai sejarah alai Jematan Batang Lupar No. 1 di Sebuyau deka ulih ditengah berengkah pagila, ngemuntangka agi mensia mayuh pulai Hari Raya Aidiladha enggau Hari Gawai taun tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, enggau nya mensia mayuh badu agi ngena feri ke udah lama dikena kenyau ari suba.
"Enggau tu, rayat mayuh muntang agi pulai Hari Raya Haji enggau Gawai Dayak ke deka datai. Enda agi nganti feri," ku iya madah.
Iya madah ke pekara nya maya ngenatai jaku simpul serimbai Aum Kunsil Nengeri (DUN) Sarawak Ke-19, Hari Tiga.
Nambah ke jaku iya, Premier Sarawak madah, penembu jematan 4.8 kilometer pemanjai nya meraka sungai pemadu panjai di Malaysia ti ngujungka Feri Triso badu agi dikena.
"Aku agi ingat suba, pejalai ngelawa pasar Simanggang nyauka enam ngagai tujuh jam.
"Tang diatu kitai meda, jalai udah manah, kitai ulih ngirup pagi din lalu pulai baru ke Kuching makai tengah hari," ku iya madah baru.
Kelimpah ari nya, iya madah, sepemanjai timpuh Langgur Pemansang Malaysia Lumpar Ke-12 (RMK-12), Perintah Sarawak udah ngaga macham transformasyen infrastruktur besai ba sejarah nengeri nyengkaum 12 iti jematan, Coastal Road Network Connectivity Programme enggau Second Trunk Road.
"Ari 21 iti jematan nya, 10 udah tembu lalu udah ditengah mensia mayuh ti nganti enam iti feri.
"Pia mega semak ujung taun tu, lapan iti agi jematan disadang ulih tembu," pia ku iya.-EDISI UKAS
