KUCHING: Perintah Sarawak entap penemu ngetan sereta negi hak nengeri ba Sempekat Malaysia 1964 (MA63) nyengkaum hak bekaul minyak enggau gas ketegal ngira pengelantang rayat Sarawak.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, penemu perintah nengeri ba pekara nya nadai kala berinsur.
Ku iya, penegap politik enggau pengelantang rama meseti dijaga sereta ditan laban nya nyadi pugu pemansang nengeri.
"Enti menua enda lantang, kitai mega deka tusah bulih pemansang, matak pemeranak Puku lalu nentu pengelantang rayat," ku iya.
Iya madah munyi nya maya nyimpul jaku ba Aum Kunsil Nengeri (DUN) Sarawak Ke-19, Hari Tiga.
Nambah ke jaku iya, Premier Sarawak madah, pemanah kaul enggau Perintah Besai semampai ditetap tang Sarawak mengkang enggau penemu negi hak Sarawak nyengkaum bekaul ungkup dikena ngadu pemansang nengeri.
Ku iya, sebagi ari pekara ti dikemeratka iya nya pemansang infrastruktur baka jalai alun, bekal ai, sekula, klinik enggau hospital lebih agi ba menua pesisir enggau ulu sungai.
Bekaul Langgur Pemansang Malaysia Lumpar Ke-13 (RMK-13), ku iya, kurang ari empat taun ngelawa taun 2030, siti timpuh ke besai reti dikena bejadi juluk ati Pelin Pemansang Udah COVID-19 (PCDS) 2030.
Berindik ari nya, Premier Sarawak minta semua agensi bekaul enggau raban kereja perintah nyeliah penanggul projek laun tembu, nyungkak tikas pemanah servis gawa sereta ngaga pemutus dikena nentu agenda pemansang Sarawak ulih digaga enggau mujur. -EDISI UKAS
