KUCHING: Isu integriti ukai semina dipeda bekaul duit tauka makai suap aja tang bela mungkur disiplin, ulah enggau tanggungpengawa ngaga pengawa enggau kuasa ke dilempai ngagai diri.
Sapit Premier Sarawak Datuk Amar Profesor Dr Sim Kui Hian madah, penumbuh Ombudsman Sarawak ngelai perintah nengeri ngemeran integriti lebih agi ketegal ngira rayat.
"Enti sesebengkah perintah ngembuan integriti, perintah ulih nyaga pengelantang rayat nyengkaum meri pelajar enda bebayar, nyaup ngelempung tating belanja enggau nyaga pengelantang pengidup rayat.
"Rayat enda agi nangi berunding sapa nyaup melanja sekula anak tauka nyaga sida jemah ila.
"Tu mih ke deka digaga Sarawak, deka meda rayat idup lantang agi," pia ku iya maya Pengerami Bejadi Integriti Sarawak ditu, Hari Empat.
Ba pengerami nya mega, Sapit Menteri ba Opis Premier Sarawak (Integriti enggau Ombudsman) Datuk Dr Juanda Jaya madah, pemansang ke dibai perintah nengeri patut disempulang integriti sereta bepelasarka undang-undang.
"Tu gaya Perintah Sarawak maya hari tu. Nya alai, maya kitai nyebut integriti, iya ukai semina nentu ke pemansang ulih digaga tang deka meda tiap iti pemansang digaga enggau chara lurus sereta nitihka undang-undang," ku iya madah.
Pengawa maya nya bela digulu Kaban Kunsil Nengeri ADUN) Batu Kitang Dato Ir Lo Khere Chiang, ADUN Kota Sentosa Wilfred Yap Yaw Sin, Direktor Unit Integriti enggau Ombudsman Sarawak (UNIONS) Wan Mohamad Wan Drahman, Sapit Tuai Ombudsman Sarawak Alexander Unya Ambon sereta ke bukai. -EDISI UKAS
